Kryeministri Rama u takua sot në Prishtinë përfaqësuesit e Aleancës për Ardhmërinë e Kosovës, nga ku deklaroi se ndalimi i Ramush Haradinajt në Francë është “një proces tërësisht i tepërt dhe se ky është fillimi i një pune të përbashkët të dy qeverive për të fshirë përfundimisht këto lista njerëzish me urdhër-arreste të një kohe, që i përket të shkuarës”.
Rama tha se me përfaqësuesit e AAK-së kanë diskutuar për situatën në tërësi dhe sfidat e përbashkëta.
“Unë uroj dhe besoj që procesi i Ramushit do të jetë përfundimi që ne duam. Nuk është fundi, por fillimi i një pune të përbashkët i dy qeverive për të fshirë përfundimisht këto lista njerëzish me urdhër-arreste të një kohe që i përket të shkuarës dhe na shfaqen në këto forma që na kujtojnë që e shkuara është një kërcënim për ne, ta bëjmë të shkuarën të pakthyeshme”, tha ai.
Nënkryetari i AAK-së, Ardin Gjini ka falënderuar kryeministrin Rama për angazhimin e tij për lirimin e Haradinajt pas arrestimit në Francë me kërkesë të Serbisë.
