Presidenti i Republikës, Bujar Nishani raportohet se ka refuzuar të takojë sot ambasadorin amerikan Donald Lu. Ky i fundit akuzoi po sot kryeprokurorin Adriatik Llalla për shkelje të Kushtetutës, pas të cilave kreu i akuzës iu përgjigj Lu-së së ai po bën sjellje jodiplomatike dhe shantazhuese ndaj prokurorisë, për qëllime personale.
Nishani mësohet se do të kërkojë sqarim në rrugë institucionale nga ambasadori Lu. Lajmi konfirmohet nga burime brenda Presidencës, për “Balkanweb”.
Por pak minuta pas këtij lajmi, burimet zyrtare nga Presidenca thanë për SYRI.net se nuk asnjë kërkesë për takim të ambasadorit të SHBA-së Donald Lu për një takim me presidentin Bujar Nishani.
Gjatë mesditës së sotme, ambasadori Lu ka bërë takime në kryeministri dhe me ministrin e Brendshëm. Takimet janë zhvilluar pas akuzave dhe kundërakuzave mes ambasadës së SHBA-së dhe Prokurorisë së Përgjithshme.
Më herët gjatë ditës, pas akuzave të ndërsjellta, e deklaratës së Prokurorisë së Përgjithshme e cila tha sot se ambasadori i SHBA-së në Tiranë, Donald Lu po sillet në mënyrë diplomatike dhe shantazhuese për interesa personale ndaj organit të akuzës, presidenti Bujar Nishani ka thirrur me urgjencë kryeprokurorin Adriatik Lalla.
Mësohet se takimi është u mbajt në ambientet e Presidencës. Temë e takimit ishte deklarata e fundit e Prokurorisë dhe marrëdhëniet me SHBA.
Po sot në mëngjes në një aktivitet, ambasadori amerikan akuzoi kryeprokurorin Llalla se ka shkelur Kushtetutën.
Sipas Lu, Llalla nuk e ka dashur reformën në drejtësi. Lu tha ai është shembulli më i qartë i asaj që po duket se si njerëz të fuqishëm po përpiqen të ruajnë kontrollin mbi gjykatat.
“Për më shumë se 18 muaj ai ka folur vazhdimisht dhe me zë të lartë kundër reformës në drejtësi”, tha Lu.
“Në nëntor dhe dhjetor prokurorët u përpoqën dhe dështuan të sekuestronin serverin e kompjuterëave të ILDKPI që është thelbësor për vetingun. Të premten e shkuar sic kërkohet nga kushtetuta e re u hodh shorti për KED, që do mbrojnë institucionet e reja të gjyqësorit. Prokurori i përgjithshëm dhunoi frymën e kushtetutës duke dërguar një listë me 3 emra. Kushtetuta është e qartë që këta anëtarë të Këshillit të Emerimeve ne Drejtesi duhet të përzgjidhen me short. Gjykata e Larte dhe Gjykata Kushtetuese dorëzuan listat më të gjata për personat e kërkuar. Në dallim me to, prokurori i përgjithshëm i përzgjodhi vetë duke dërguar vetëm një listë me 3 emra përzgjedhur vetë pa transparencë”, tha Lu.
Pas kësaj reagoi Prokuroria e Përgjithshme, e cila denoncon përmes një letre drejtuar presidentit Bujar Nishani dhe kryeparlamentarit Ilir Meta, se Ambasadori i SHBA në Tiranë, Donald Lu është duke vepruar jodiplomakisht ndaj prokurorëve, duke kushtëzuar vizat e tyre.
Fjorida Ballauri shefe e Kabinetit të Prokurorisë në një konferencë për mediat u shpreh sot se veprimet e ambasadorit Lu janë jodiplomatike.
Sipas saj ambasadori Lu ka kërkuar mbylljen e hetimeve për Bankers Petrolium.
Prokuroria akuzoi ambasadorin Lu se është duke bërë jë hakmarrje personale ndaj kryeprokurorit Adriatik Llalla, për shkak se kanë pasur qëndrime e mendime të ndryshme në lidhje me Reformën në Drejtësi dhe dekriminalizimin.