Dy raste të njëpasnjëshme mbi dyshimin për mjete shpërthyese kanë alarmuar Prishtinën sot.
Një çantë e dyshimtë afër shkollës “Elena Gjika”, dhe një taksi me targa të Beogradit, afër hotelit “Grand”, kanë që dy objektet e dyshuara për bombë. Policia e Kosovës ka reaguar në të dyja rastet, ku për orë të tëra kanë ekzaminuar vendet, kanë kontrolluar objektet dhe më pas i kanë larguar ato pasi që është vërtetuar se bëhet fjalë për “alarme të rrejshme”. Sa i përket rastit afër hotelit “Grand”, nënkoloneli Rexhep Sijarina, i cili njëkohësisht është edhe drejtor i rajonit të Prishtinës, ka thënë se policia nuk ka gjetur asnjë mjet shpërthyes në veturë. “Rreth orës 16:00 është gjetur një veturë e lënë afër hotelit ‘Grand’. Ajo ka qenë e ndezur, e hapur dhe policisë i është dukur e dyshimtë pasi që brenda ka pasur edhe para të Republikës së Serbisë dhe një telefon, ndërsa shoferi nuk ka qenë brenda”, ka thënë Sijarina.
Sipas tij, i dyshuari më pas është lokalizuar dhe nuk bëhet fjalë për ndonjë gjë të planifikuar. “Ne nuk kemi gjetur asgjë të dyshimtë në makinë. Shoferi është identifikuar. Ai e ka lënë makinën dhe ka shkuar në manastirin e Graçanicës. Ndërkohë ne kemi rënë në kontakt të vëllait të tij, i cili së bashku me një prift ka ardhur në stacionin e Policisë. Edhe shoferi tashmë është nisur në drejtim të Prishtinës”, ka konfirmuar nënkoloneli Sijarina.