Ish-Kryeministri Sali Berisha ka sjellë sot në Kuvend një provë të asaj që ai e quajti “thikë pas shpine” të sigurisë kombëtare të vendit nga Kryeministri Edi Rama: votimin kundër të Shqipërisë në NATO pikërisht në ditën kur fitoi zgjedhjet në SHBA, Presidenti i ri Donald Trump.
“Ky dokument i Aleancës së Atlantikut të Veriut, që nuk është i klasifikuar, por i shpërndarë, – tha Berisha, – midis të tjerash thotë se ‘NATO konfirmon shkurajimin e bazuar në një përzierje të përshtatshme të kapaciteteve nukleare dhe raketore dhe kjo mbetet shtyllë kryesore, element kryesor i strategjisë së përgjithshme të NATO-së për sa kohë armët nukleare të ekzistojnë. NATO-ja do të mbetet aleancë nukleare. Për këtë arsye ne e ndjejmë se përpjekjet për të negociuar në mënyrë imediate apo për të legjitimuar shkurajimin nuklerar, janë themelisht në kundërshtim me NATO-n, themelisht në kundërshtim me politikat bazë të NATO, mbi diferencën dhe interesat që ne ndajmë për sigurinë.’
Mbi bazën e këtij dokumenti, që mban datën 20 tetor në komitetin e parë të OKB-së, Shqipëria voton direktivën e NATO-s, voton aleatin kryesor.
Çfarë ndodhi z.Majko?
Pasi fitoi Donald Trump, në datën 20 dhjetor, Shqipëria voton kundër!!! Kundër strategjisë së NATO-s!!! Shqipëria voton kundër kërkesës së aleatit tonë kryesor sepse “ne duhet t’i prishim marrëdhëniet” me aleatin tonë kryesor!
Nuk po them se ne kemi shkelur me të dyja këmbët angazhimet tona ndaj NATO-s, siç është buxheti, por të votosh kundër asaj që kërkojnë shtete si Franca dhe Britania e Madhe, fuqi nukleare, a nuk është kjo thikë në interesin e sigurisë kombëtare?! Kush i drejton këta? Nga kush frymëzohen këta?! Nga Teherani? Apo kthehen mbrapsht tek etërit e tyre?!
A mund të ndodhë që Shefi i Ekzekutivit të Shqipërisë të mos t’i dërgojë urim, Shefit Ekzekutiv të SHBA-së?! I çon Presidentit urim, detyrimisht i çon dhe Kryeministrit. Por kur bëhesh një pinjoll i Sorosit, kur shet çdo interes…
A nuk është kjo një shkelje madhore e interesit kombëtar, e sigurisë kombëtare, një përpjekje flagrante për të dëmtuar marrëdhëniet mes Shqipërisë dhe SHBA?! Votoi kundër për t’u dhënë një sinjal jashtëzakonisht negativ!
Unë edhe herë të tjera e kam thënë dhe e theksoj se kjo shumicë qelbësirash shkoi para se të vinte në pushtet, në Stamboll! Dhe mori aty një libër të mikut tim Davutoglu, një akademik brilant, që ka si thelb, ‘zero probleme me fqinjët’.
Shikoj unë këtu në program, ‘zero probleme me fqinjët’!
Këtë mund ta thonë SHBA, mund ta thotë Turqia që i doli për hundësh dhe sot ka problemet me të mëdha, po na dolën dhe këta. Po ç’zero problem?! Për fatin tragjik të historisë tënde ti je i shpërndarë, jeton kudo! Ja ç’ndodhi në Kumanovë!”- nënvizoi ish-kryeministri.