I arrestuari nën akuzën se tentoi të përdhunonte shitësen e dyqanit të tij, Besim Lami rezulton person me precedentë të mëparshëm penalë, i dënuar dy herë për shfrytëzim prostitucioni.
Sipas “Panoramës”, hera e fundit që Lami përfundoi në prangat e policisë e më pas vuajti edhe dënimin për disa vite ishte më 23 prill të vitit 2010.
Raportohet se afro 7 vjet më parë, ai u arrestua nga oficerët e Antitrafiqeve gjatë operacionit të koduar “Red Lights”, që u zhvillua gjatë natës në një hotel me 5 yje dhe mjaft të njohur në kryeqytet. Lami asokohe u arrestua bashkë me një mikun e vet për shfrytëzim prostitucioni në rrethana rënduese.
Policia deklaroi në atë kohë se të dy këta persona ishin dënuar edhe më parë për të njëjtën vepër penale, ndërsa vajzat që shfrytëzonin vinin nga një shtresë shoqërie e varfër dhe në këtë mënyrë josheshin nga djemtë e më pas ushtronin prostitucion, raporton “Panorama”.
Mësohet se klientët e tyre ishin kryesisht shtetas të huaj që ushtrojnë funksione të ndryshme në Shqipëri, madje edhe pagesa që ata bënin për të kaluar një natë me secilën prej vajzave ishte e një klasi të lartë. Pagesa që paguanin klientët varionte nga 200 deri në 400 euro, në varësi edhe të hoteleve ku vajzat ushtronin prostitucion.
Bashkë me dy tutorët, policia asokohe arrestoi në flagrancë duke ushtruar prostitucion në një prej hoteleve luksoze të Tiranës, edhe vajzat me iniciale G.M., 24 vjeçe, O.C., 22 vjeçe dhe F.Ll., 23 vjeçe, të tria të dënuara edhe më parë për këtë vepër penale.
