Policia italiane ka ekzekutuar një operacion në të gjithë territorin e Italisë ndaj 54 personave, të akuzuar si të përfshirë në një trafik ndërkombëtar të lëndëve narkotike, raporton “ANSA”.
Operacioni është kryer me urdhër të Drejtorisë Rajonale të Antimafias ndaj një klani të Ndrangetës kalabreze.
Raportohet se gjatë aksionit janë sekuestruar 8 tonelata kokainë në Kolumbi me destinacion Italinë dhe sasi të ndryshme nga 60 deri në 100 kilogramë në Itali dhe vende të tjera të Europës.
“Operacioni konfirmon raportin e privilegjuar të Ndrangetës me trafikantët amerikano-jugorë, me marrëveshje dhe me role të caktuara. Gjithashtu tregon aftësitë e mafias kalabreze për të menaxhuar drogën në shumë rajone të vendit”, ka thënë kryeprokurori i Antimafias së Katanzaros, Nicola Gratteri.
Sipas tij, kokaina mbërrinte në Itali përmes porteve në Xhoia Tauro, në jug të “çizmes”, në Xhenova dhe Napoli.
