NATO ka reaguar pas deklaratës shokuese të presidentit të zgjedhur amerikan, Donald Trump, se aleanca është e panevojshme.
Deklarata e Trump se NATO-ja është “vjetruar”, ka shkaktuar “shqetësim” tek aleanca, tha ministri i Jashtëm i Gjermanisë, FrankWalter Steinmeier.
Këto komente ministri i bëri për gazetarët në Bruksel, në prag të takimit të ministrave të Jashtëm të BE.
“Po vi pas një bisede që pata me sekretarin e përgjithshëm të NATOs, Jens Stoltenberg. Në NATO, sidomos, janë pritur me shqetësim deklaratat e bëra nga president i zgjedhur, Trump – deklarata e tij se NATO është vjetruar. Mbi të gjitha, kjo është në kundërshtim me deklaratat që ka bërë sekretari i nominuar i Mbrojtjes pak ditë më parë. Duhet të shohim se çfarë do të thotë kjo për strukturën politike amerikane”, tha Steinmeier.
Në seancën dëgjimore në Senat, i zgjedhur i Trumpit për sekretar të Mbrojtjes, James Mattis, ka thënë se NATO është në qendër të mbrojtjes amerikane. Ai po ashtu ka akuzuar presidentin rus, Vladimir Putin, se po bën përjekje ta përçajë aleancën. Në një intervistë për disa gazeta evropiane, Trump ka thënë se NATO është vjetruar sepse nuk e ka trajtuar terrorizmin, raporton REL.