Propozimi i LSI për lista të hapura në zgjedhje është rrëzuar me sa duket përfundimisht nga aleati i saj PS.
Bashkëkryetari socialist i komisionit të posaçëm për reformën zgjedhore, Taulant Balla u shpreh se listat e hapura nuk mund të pranohen, pasi nuk favorizohen gratë.
“Edhe në këto zgjedhje nuk do të kemi lista të hapura. Edhe pse vetë jam pro maxhoritarit të pastër. Nëse aplikohen lista të hapura, fleta e votimit do ishte si libër 66 faqe. Lista e hapur penalizon gratë, nëse aplikohen nuk do ketë më shumë se 3 gra. E rëndësishme është të respektohet vullneti i qytetareve. Çdo korrektim super profesional që modifikon vullnetin e zgjedhësit nuk na çon gjëkundi”, tha Balla.
Lidhur me kërkesën tjetër për votimin elektronik Balla shprehet janë përballur me pamundësi teknologjike.
“Për votimin elektronik, a ishin të gjithë dakord? Po! Jemi përballur me pamundësi teknologjike të cilës ne si politikë nuk i dalim dot ballë. Nëse ekspertiza profesionale na garanton dhe e merr përsipër, hajde ta bëjmë. Por nuk duhet të harrojmë se ka dyshime edhe në SHBA mbi këtë sistem. Edhe sikur të marrim dy dite më shumë për numërimin nuk është problem,” tha Balla.
PD dhe LSI kanë kërkuar njërëzi lista të hapura për deputetë dhe votim elektronik në zgjedhjet e ardhshme të qershorit.
