NGA ERVIN SALIANJI
U desh një mot me acar, siç e ka thuajse çdo vit Shkupi apo Beogradi, si edhe shumë qytete të tjera në rajon, që bojatisja 3 vjeçare e qeverisë së paRilindur shqiptare të rrëzohej dhe të thërrmohej që në gripin e parë të përballimit me natyrën. Për ironi, Edi Rama është bërë edhe më acarues në këtë acar, duke u shfaqur më shume nëpër hotele luksoze bashkë me ministrat e tij dhe duke bërë llogaritarin e mandateve të ardhshme apo fallxhoren e fatit me Metën.
Sepse ankthi i zgjedhjeve, luhatjet e Metës dhe ngritja e opozitës nuk e lënë Ramën të qeverisë. Acari ngriu kështu të gjithë ngrehinën prej kartoni të bojatisur të “rilindjes”, ndërkohë që numërohen kufomat e ngricës dhe paaftësisë qeverisëse. Kanë dështuar shërbimet sociale, ka dështuar pushteti vendor i drejtuar nga socialistët, ka dështuar qartas shërbimi shëndetësor, sepse 345 milionë eurot e vjedhjes me partneritetin e ashtuquajtur publik – privat nuk kanë mundur të përballojnë në mënyrë normale, as edhe një virozë apo grip banal, që çdo vit qarkullon në Shqipëri!
U mbyllën shkollat dhe u paralizua jeta normale, për të mos i çuar në katastrofë spitalet publike, që përveç parave që u merren për llogari të oligarkëve të qeverisë, u rripet lëkura duke paguar për çdo shërbim, që nga hyrja dhe parkimi e deri te shtrimi në krevat spitalor. Sepse duhen para për ilaçe, para për çdo shërbim, para për aparaturat e prishura që bëhen funksionale kundrejt pagesave ekstra. Por Kryeministri merret me presionin ndaj pronarëve të mediave dhe me persekutimin e gazetarëve që nuk janë në shërbim të tij.
Ai përgatitet për Zgjedhje si për Luftë, duke liruar të burgosurit dhe duke u dhënë atyre mundësinë që të rehabilitohen për fushatën zgjedhore që po vjen. Sigurisht, duke u caktuar atyre detyra kriminale për të deformuar procesin e ardhshëm zgjedhor. Rama nuk merakoset që ka dështuar në administrimin e emergjencës kombëtare, që në të vërtetë nuk është as edhe emergjencë, sepse ishte një situatë e paralajmëruar prej kohe. Qindra fshatra janë bllokuar pa ushqim, pa energji, pa rruge, në mëshirë të motit dhe acarit, me asnjë shërbim realisht të përforcuar nga reforma territoriale qe i ka larguar shërbimet fare larg qytetarëve.
Sepse ky acar, ka nxjerrë blof edhe reformën territoriale, duke nxjerrë zbuluar bashkitë e reja, që nuk menaxhojnë dot territoret e stërmëdha dhe numrin e lartë të banorëve që duhen të mbikëqyrin. Ky acar, që ngrin shqiptarët e braktisur, bëri akull edhe propagandën pabukse për reformën në energji, sepse rritja e çmimit të energjisë vetëm se sa shtoi kostot e faturave duke zbrazur xhepat e të gjithëve. Sepse është kjo qeveri që i fali CEZit 600 milionë euro, sikur të ishin karamele, ndërkohë që kjo është një superzhvatje kombëtare, që do të ketë pasoja afatgjata varfëruese për të gjithë.
Paratë e energjisë të mbledhura edhe me gjakun e qytetareve, si rasti për 30 mije lekë të vjetër i të ndjerit Qamil Zela në Lushnjë, apo me burgosjen e mijëra të tjerëve në të gjithë Shqipërinë, nuk solli asnjë zhvillim në sektor. Mungesa e investimeve në rrjet dhe në burime njerëzore ka bërë që më shumë se gjysma e fshatrave në Shqipëri të jenë në errësirë për ditë të tëra, që heroizmat e elektricistëve të papaguar mirë dhe të veshur edhe më keq ka bërë që të rikthehet në shumë të tjera.
Dështimi bëhet edhe me rrëqethës kur shikon që paratë e marra me kërbaç kanë shkuar për marrjen me qira me çmime stratosferike të godinave të deputetëve të rilindjes, apo për suvatimet e godinave që janë shndërruar në rezidenca luksoze. Acari i ngriu qeverisë edhe propagandën për rrugët. Dështimin me rrugët, me infrastrukturën, përveç mungesës së asnjë aksi kombëtar të shtruar me asfalt apo të mbyllur nga projektet e lëna të gatshme nga qeveria e mëparshme.
Dështimi me rrugët nxori në pah edhe sherrin e partneritetit të famshëm me privatin. Qindra rrugë dhe akse nuk u zhbllokuan dot në kohë, nuk iu hodh as kripë, sepse edhe kripa mungonte! Por Kryeministri e ka mendjen te Zgjedhjet dhe mendon se duke iu lëpirë Ilir Metës, ose duke shantazhuar këdo që i del para në luftën për pushtet, do të bëjë votat që duhen dhe do t’ia hedhë edhe kësaj radhe. Unë mendoj se shqiptarët kanë kujtesë të mirë dhe pavarësisht vapës së Qershorit, do ta kujtojnë fare mirë këtë Acar, të këtyre ditëve dhe këtë braktisje në vështirësi ekstreme gjatë gjithë mandatit të qeverisë së paRilindur!
