Shqyrtimi fillestar në Gjykatën Themelore të Gjakovës, ku Fatmir Limaj është paraqitur në cilësinë e të akuzuarit për krime lufte, ka përfunduar.
Mediat kosovare raportojnë se prokurorja Drita Hajdari ka lexuar aktakuzën kundër Limajt, të cilin e akuzon se ka kryer krime lufte gjatë luftës në Kosovë.
Limaj akuzohet se nuk ka ndërmarrë masat e nevojshme për të parandaluar ose zbuluar vrasjen e Ramiz Hoxhës nga Bellanica dhe Selman Binishit, që kishin ndodhur me 2 tetor të vitit 1998, trupat e të cilëve janë gjetur në hyrje të fshatit Kravasari, njofton “Klan Kosova”.
Sipas aktakuzës motivi i vrasjes së tyre ka qenë se ata kanë qenë bashkëpunëtorë të Serbisë. Për këto vepra Limaj akuzohet se ka shkelur rëndë Konventat e Gjenevës. Por, vetë Limaj është deklaruar i pafajshëm dhe këtë aktakuzë e ka quajtur të shpifur.
