Ish-kryeministri kosovar, Ramush Haradinaj do të qëndrojë në paraburgim në Francë deri sa të mbërrijë kërkesa formale për ekstradim për krime lufte nga Serbia.
Ky ishte vendimi i gjykatës së Apelit në Colmar të Francës ditën e sotme.
Lajmi bëhet i ditur nga “Le Figaro”, e cila citon deklaratën e prokurorit të përgjithshëm francez.
Menjëherë pasi të mbërrijë kërkesa për ekstradim nga Serbia, Gjykata e Apelit të Colmarit do të vendosë mbi ligjshmërinë e kërkesës nga Beogradi, siç thekson prokurori.
Haradinaj u arrestua një ditë më parë në Aeroportin e Basel-Mulhouse-Freiburg, nga policia kufitare, vetëm pak pasi zbriti nga një udhëtim të nisur nga Prishtina.
Kosova e denoncoi arrestimin e kreut të AAK-së si të paligjshëm dhe të pakuptueshëm, ndërsa kërkoi nga Bashkimi Europian që t’i bënte presion Serbisë të tërhiqte urdhërarrestet e vjetëruara ndaj ish-luftëtarëve të UÇK-së.
Sipas burimeve të Sigurisë në Prishtinë, ekzistojnë rreth 20 fletarreste ndërkombëtare të Serbisë në emër të shtetasve kosovarë, shumica pjesëtarë të UÇK-së. Në anën tjetër, autoritetet kosovare të Drejtësisë kanë shpallur në kërkim 57 serbë, të dyshuar për krime lufte në Kosovë gjatë viteve ’98-’99. Kërkesat për arrestim ndërkombëtar të tyre janë lëshuar me vendim të gjyqtarëve të procedurës paraprake të EULEX-it dhe gjyqtarëve kosovarë.
/ Top Channel
