Një raport i Komisionit Europian vërteton shprehjen se “shqiptarëve u pëlqen qyli”. Pas shumë sondazheve në vendet anëtare në BE dhe atyre kandidate si Shqipëria, KE publikoi një renditje të shteteve ku ka më shumë presion në punë, dhe Shqipëria është në grupin e vendeve me presion më të ulët, bashkë me disa vende të tjera në rajon, si Serbia, Maqedonia, Kroacia dhe Bullgaria.
Edhe pse sipas INSTAT shqiptarët punojnë 44 orë në javë, më shumë se punonjësit e shumë shteteve të zhvilluara, ky raport i ri tregon se vërtet punojmë me orë më të zgjatura, por punët i marrim “me terezi”. Në fakt, rajoni ynë del të jetë disi “përtac”, sepse shtete si Serbia, Maqedonia, Kroacia e Bullgaria janë madje më keq se ne kur vjen fjala për të zgjatur kryerjen e detyrave në punë.
Por nëse një shqiptar mesatar do të shkonte të punonte në Qipro, Greqi, Francë, Suedi, Britani, Danimarkë apo Bullgari, do ta kishte mjaft të vështirë të përshtatej me ritmin e punës. Këto shtete renditen ndër vendet me presion më të lartë pune. Nëse keni ëndërruar pra të shkoni të punoni në Suedi sepse atje dita e punës është 6 orë, mos e quani aq të thjeshtë.
