Grabitja e një kazinoje në Tiranë dhe tentativa për të realizuar grabitjen e dytë brenda pak orësh kanë çuar në pranga një 45-vjeçar në kryeqytet.
Ilir Leli grabiti xhiron ditore, 80 mijë lekë të reja nën kërcënimin e armës në një pikë lojrash fati dhe pas disa minutash tenton të realizojë dhe grabitjen e një kazinoje tjetër.
Por autori i dyshuar u vu në pranga gjatë tentativës për realizimin e grabitjes së dytë. Sipas policisë, Ilir Leli ka grabitur nën kërcënimin e armës së zjarrit, një pikë lojrash fati tek Zogu i Zi, ku ka marrë një shumë monetare.
Shërbimet e Policisë porsa kanë marrë njoftim për ngjarjen e ndodhur kanë ngritur pika kontrolli dhe ka kanë filluar krehjen e zonës. Shërbimet e Policisë kanë marrë informacion se autori i dyshuar po tenton të grabisë nën kërcënimin e armës një pikë tjetër në afërsi të Komisariatit të policisë numër 3.
Falë ndërhyrjes në kohë të shërbimeve të Policisë të Komisariatit të Policisë nr 3 u bë kapja në flagrancë brenda në Kazino e autorit në tentativë për të realizuar grabitjen e dytë. Në cilësinë e provës materiale është sekuestruar një armë zjarri tip pistolet model 54 i tipit TT.
Specialistët e Policisë po punojnë nëse është dhe autori i grabitjes tek rruga e Elbasanit.
Materialet i kanë kaluar Prokurorisë së Tiranës për veprat penale “Vjedhje me armë”, “Prodhimi dhe mbajtia pa leje e armëve luftarake dhe municionit”.
