Një 25 vjeçar shqiptar, emigrant në Francë është dënuar nga gjykata me 2 vite burg si pjesë e një rrjeti të trafikut dhe shpërndarjes së lëndës narkotike të llojit heroinë.
Lajmi bëhet i ditur nga mediat locale sipas të cilave, 25-vjeçari Elsit Shahi u kap më 20 dhjetor në Albertville.
Ai kishte parkuar automjetin në anë të rrugës në një zonë të pyllëzuar, ndërsa u pikas nga policia duke fshehur 10 mijë Euro. Kjo bëri që të lindin dyshimet e policisë, dhe nga kontrolli I ushtruar në automjetin e tij u zbuluan dhe sekuestruan 35 gram heroinë dhe 15 gram kokainë.
Gjatë marrjes në pyetje, shqiptari pranoi se është i përfshirë në trafikun e heroinës.
“E bëj sepse jam i detyruar të ndihmoj familjen. Si shumë shqiptarë, kam ardhur në Francë për të kërkuar punë, por nuk kam gjetur”, i tha 25-vjeçari hetuesve.
Avokati i tij mbrojtës kundërshtoi dënimin me burg dhe kërkoi një masë më të butë. Në fund gjykata vendosi ndaj emigrantit shqiptar 2 vite burgim, gjobë 6 mijë Euro dhe ndalim të përhershëm në territorin francez.
