Policia ka dhënë detaje të reja mbi ngjarjen e ndodhur mbrëmjen e djeshme në Ksamil, ku ka mbetur i vrarë 53-vjeçari, Agron Xhezairi. Sipas policisë së Sarandës, po hetohet zyrtarisht pista e gjakmarrjes, duke marrë parasysh dinamikën e kryerjes së krimit.
Sipas grupit hetimor, autorët e vrasjes kanë qëlluar nga rrethimi i shtëpisë fqinje e cila aktualisht është e pabanuar. Banesa e viktimës, ndodhet në një zonë të veçuar të Ksamilit, ndaj autorët e kanë pasur të lehtë shënjestrën.
Paraditen e sotme, policia bën me dije se ka shoqëruar së paku 6 persona në Komisariatin e Sarandës për vrasjen e Agron Xhezairit. Të shoqëruar janë edhe familjarë të Aleksandër Bardhit, vrarë pak kohë më parë në Sarandë, e për të cilin është shpallur në kërkim dajli i viktimës së mbrëmshme.
Nga të dhënat paraprake bëhet me dije se viktima fillimisht ka mbetur i plagosur para shkallëve të banesës dhe ka tentuar që të futet në shtëpi, por autorët e kanë qëlluar sërish duke e lënë të vdekur në vend disa metra më tutje në hyrje të banesës.
Xhezairi është babai i 20 vjeçarit të shpallur në kërkim Albi Xhezairi, i akuzuar për vrasjen e Aleksandër Bardhit në fshatin Shëndelli, ngjarje e ndodhur më 25 shtator.
