Pavarësisht skandaleve të shumta dhe të përgjimeve të publikuara nga partia opozitare, Nikolla Gruevski ka arritur t’i fitojë sërish zgjedhjet të paktën nga rezultatet e deri më tanishme.
Sipas mediave në Maqedoni, nga 94 % e kutive te numëruara VMRO-DPMNE e Nikola Gruevskit ka marrë 51 mandate, dy mandate më shumë se partia LSDM e Zoran Zaev. BDI e Ali Ahmetit ka marrë 10 mandate, ndërsa Besa ka marrë 5 mandate.
Me rreth 2% më pak të votave, renditet partia më e madhe opozitare, LSDM, e cila ka arritur të marrë 436 469 vota, ose 36.69%.
Nga partitë shqiptare, e para renditet partia e Ali Ahmetit, me 86 812 vota ose 7.30%, e ndjekur nga partia Besa, me 57.927 vota, ose 4.87%.
Gruevski flet tani si kryeministër i ardhshëm duke falenderuar të gjithë votuesit e VMRO-së por edhe ata që nuk e kanë votuar. “Në fillim më lejoni të uroj të gjithë qytetarët për zgjedhje të qeta dhe demokratike” kështu tha Gruevski në paraqitjen e tij para simpatizantëve mbrëmë vonë.
Kryetari i Bashkimit Demokratik për Integrim (BDI), Ali Ahmeti, thotë se partia e tij ka fituar zgjedhjet por siç thotë ai, nuk është i lumtur për këtë fitore, pasi shqiptarët kanë humbur shumë mandate. Kjo sipas Ahmetit ka ndodhur pasi është shpërndarë vota ndër shqiptarë, për shkak të daljes në sipërfaqe të shumë partive të vogla shqiptare.
Shqiptarët kanë fituar gjithsej 20 mandate, dhe në zëra të përgjithshëm kjo është humbje për ta, pasi ky tregues përbërn zvogëlim të pranisë së tyre në parlamentin maqedonas.
Kjo ka bërë që në rrjete sociale të shpërthejnë dhe akuzat për tradhëti, pas një votë e madhe shqiptare i është dhënë opozitës maqedonase.