Megjithëse është një nga emrat më të lakuar nga policia dhe politika, për Klement Balilin, i ashtuquajturi “Escobari i Ballkanit” është i lirë dhe lëviz lirshëm në Shqipëri.
Hektor Balili thotë se për vëllain e tij, Klement Balili nuk ka asnjë urdhër arresti dhe shton se gjithçka që po qarkullon në publik rreth tij është e gjitha një lojë politike. Ai jep edhe detaje për vendin ku ndodhet i vëllai.
Hektori deklaron në një prononcim për TCH se Klementi, jo vetëm që nuk është arratisur, por madje vijon jetën e tij normalisht.
“Klementi këtu ka qenë tërë kohës. Sot u nis në Tiranë për dokumente, sepse për atë nuk ekziston urdhër-arresti. Kjo është e gjitha një lojë politike”, shprehet ai.
Mëngjesin e sotëm, rreth 200 forca policie, të Policisë se Shtetit, forcat e lëvizshme operacionale, të ndihmuar nga efektivët e Sarandës dhe të Gjirokastrës kanë nisur operacionin për prangosjen e Balilit, pagëzuar nga mediat greke si ‘Eksobari i Ballkanit’.
Në Sarandë, Forcat e Ndërhyrjes së Shpejtë kanë ushtruar kontroll me urdhër të Krimeve të Rënda në kompleksin ‘Santa Quaranta’ dhe në disa prona e banesa te tjera të Klement Balilit. Në sitë do të kalojnë gjithë bizneset e Balilt, banesa dhe gjithë vendet e dyshuara ku mendohet se ai mund të strehohet, pohuan burime nga policia, por nga ana tjeter vëllai mohon se ka një urdhër arresti për Klementin.
Kontrollet bëhen në kuadër të hetimit që ka nisur për përfshirjen e tij në trafik ndërkombëtar të drogës dhe vijnë fill pas ardhjes së dosjes nga Greqia në adresë të tij.
