Nga Ilir Sinanaj
Për herë të parë Bashkimi Evropian në një dokument zyrtar të vlerësimit periodik të rrugëtimit evropian të Shqipërisë ka bërë të ditur me shifra paligjshmërinë në ekonominë shqiptare.
Sipas Progres-Raportit të BE-së për Shqipërinë i vitit 2016, më shumë se 1/3 e ekonomisë shqiptarë vjen si pasojë e veprimtarisë së paligshme. Gjithashtu BE-ja nënvizon, se kjo paligjshmëri çon në probleme në konkurrencën e lirë të sipërmarrjeve, duke ndikuar në klimën e mjedisit në Shqipëri.
“Mangësi në sundimin e ligjit vazhduan të pengonin mjedisin e biznesit, por reforma në drejtësi përparoi. Ekonomia informale (e paligjshme) përllogaritet të përbëjë më shumë 1/3 e Prodhimit të Brendshëm Bruto, duke çuar në humbje të të ardhurave nga tatimet, një mungesë të mbrojtjes në punë dhe konkurrencës së paligjshme ndërmjet firmave. Zbatimi jo efikas (jo i plotë) i kontratave, të drejta pronësie të papërcaktuare dhe mbizotërimi i korrupsionit janë shqetësime të shprehura shpesh nga sipërmarrjet. Reforma në drejtësi me shtrirje të gjerë, e cila synon të luftojë këto probleme të ndërlidhura, bëri progres të rëndësishëm me miratimin parlamentar unanim të ndryshimeve kushtetuese në korrik. Zbatimi i saj i suksesshëm kërkon veprim ligjor të mëtejshëm dhe forcimin e institucioneve. Qeverisje më e mirë, një zbatim më i parashikueshëm dhe i vazhdueshëm i rregullave dhe një ofrim më efikas (i plotë) i shërbimeve publike do ta përmirësonin ndjeshëm mjedisin e sipërmarrjes”, bëhet e ditur në faqen 28, të Progres-Raportit të BE-së për Shqipërinë i vitit 2016.
