Policia sekuestroi gjatë natës në portin e Durrësit një sasi prej 30 kg drogë e llojit heroinë. Droga ishte fshehur në një kamion që do të udhëtonte për në Itali dhe ishte e ndarë në 52 pako.
Sipas policisë droga u sekuestrua ndërkohë që kamioni do të ngarkohej në një prej trageteve të linjës Durrës-Bari. Heroina ishte e fshehur në brendësi të kamionit, por u konstatua falë skanerave të doganës dhe informacioneve që policia kishte siguruar në rrugë operative.
Kamioni mësohet se ishte nisur nga Elbasani, i ngarkuar me dru dhe do të shkonte në vendin e përtej Adriatikut.
Në pranga për këtë sasi të madhe droge, është vënë vetëm shoferi i kamionit Aurel Kryemadhi 45 vjeç, banues në Elbasan.
Materialet i kaluan Prokurorisë së Krimeve të Rënda Tiranë për veprime të mëtejshme për veprën penale”Trafikimi i narkotikëve” e mbetur në tentativë.
