Policia e Tiranës jep versionin zyrtar të ngjarjes me makinën “Alfa Romeo”, ku personat që ndodheshin në mjet terrorizuan qytetarët pasditen e sotme.
Sipas policisë njoftimi se disa persona qarkullonin me armë zjarri kishte ardhur që në orën 14:40 të ditës së sotme, por vetëm në 20:30 “Shqiponjat” janë vënë në ndjekje të tij.
“Më datë 02.12.2016, rreth orës 14:40, ka ardhur një telefonatë në numrin e emergjencave 112, se në kryqëzimin e rrugës “Mujo Ulqinaku”, me rrugën e “Kavajës”, në automjetin tip “Alfa Romeo”, dyshohet se personat në brendësi të saj, qarkullojnë me armë zjarri. Rreth orës 20:30, shërbimet e skuadrës “Shqiponjat”, kanë konstatuar mjetin në afërsi të ish restorant Durrësit, të cilët duke përfituar nga mbyllja e semaforit, kanë krijuar pak distancë të mjaftueshme për të braktisur mjetin dhe për tu larguar”, deklaron policia.
Nga kontrolli i ushtruar në mjet janë gjetur dy doza me lëndë të dyshuar narkotike të llojit Cannabis Sattiva.
Grupi hetimor në vendin e ngjarjes ka identifikuar pronarin e mjetit shtetasin B. K., gjithashtu ka arritur të identifikojë se përdorues i këtij mjeti është edhe shtetasi K. L., 25 vjeç, me precedent penal në fushën e vjedhjes. Po punohet për gjetjen e personave të cilët ndodheshin në këtë mjet.