Kryetari i FRD Bamir Topi deklaroi se parlamenti ka nevojë të ketë më pak deputetë. Këto deklarata Topi i bëri në mbledhjen e Asamblesë së partisë që ai drejton dhe akuzoi klasën politike si penguese e zhvillimit të vendit.
Topi ka shprehur ato që FRD i ka konsideruar si të nevojshme përsa i përket çështjeve që lidhen me zgjedhjet dhe reformat, duke nënvizuar se reforma zgjedhore duhej të bëhej paralel me reformën në drejtësi.
“ Reforma zgjedhore duhet të garantojë zgjedhje të lira dhe të ndershme. Duhet të depolitizohen komisionet zgjedhore. Listat duhet të jenë të hapura që reforma në drejtësi duhet të kishte shkuar paralelisht me reformën zgjedhore”, theksoi ish-presidenti.
Një kritike kishte edhe për ish-kryeministrin Berisha të cilin e akuzoi se ka përcarë të djathtën dhe është përpjekur të pengojë reformën në drejtësi.
Kreu i FRD deklaroi se nuk ka vendosur ende se çfarë pozicion do të marrë partia e tij në zgjedhjet e ardhshme dhe nuk është vendosur për koalicionet.
