Komisioni Qendror i Zgjedhjeve, me 6 vota pro dhe një votë kundër, miratoi të mërkurën kërkesën e Partisë Demokratike për shtyrjen e vendimmarrjes “për ndarjen e mandateve zgjedhore në Kuvendin e 2017-s”. Vendimi për këtë çështje do të merret në mbledhjen e datës 3 dhjetor.
Përfaqësuesi ligjor i PD-së në KQZ, Ivi Kaso, tha se materiali i kërkuar nga Drejtoria e Përgjithshme e Gjendjes Civile, në funksion të këtij akti, është shumë voluminoz dhe për këtë ai kërkoi më shumë kohë në shqyrtimin e tij.
“Gjendja civile ka mbyllur sytë për manipulimet me zgjedhësit në të kaluarën, ndaj kërkojmë më shumë kohë për të parë të dhënat që na ofron Gjendja Civile”, tha eksperti Kaso.
Por, kundër kësaj u shpreh përfaqësuesi ligjor i PS-së në KQZ, Genc Gjoncaj, i cili tha se opozita e ka marrë materialin që të premten dhe ka pasur kohën e mjaftueshme për ta shqyrtuar.
Pas diskutimeve nga anëtarët e KQZ-së u ra dakord shtyrja e vendimmarrjes më 3 dhjetor, ora 09:00. “Mos na kërkoni shtyrje të mëtejshme, pasi nuk vazhdon pafundësisht kjo histori”, u shpreh kryetari i Komisionit, Denar Biba, në mbyllje të mbledhjes së sotme.
Ai gjithashtu bëri me dije se të enjten KQZ do të mblidhet për shpalljen e rezultatit përfundimtar të zgjedhjeve për kryebashkiak në Kolonjë, ku fitues u shpall kandidati i maxhorancës, Ilia Stefo.
Po të enjten KQZ pritet të zgjedhë dhe nënkryetarin e saj, pas dorëheqjes nga ky post të Denar Bibës, i zgjedhur më pas nga parlamenti në postin e kryetarit të KQZ-së.
Ndërsa më 2 dhjetor Komisioni Zgjedhor pritet te diskutojë projektvendimin “Për miratimin e Zonave të Administrimit Zgjedhor(ZAZ), në Kuvendin e 2017-s”.
