Kryetari i opozitës Lulzim Basha ka paralajmëruar një përballje të fortë me qeverinë nesër në Kuvend për projektbuxhetin e vitit 2017. Basha deklaroi sot se buxheti i vitit 2017 është një buxhet antisocial, duke e vënë theksin mbi të gjitha tek një rritje e re e taksave.“Ky buxhet, – tha Basha, – konfirmon vitet pararendëse: Sërish rritje taksash, 10 milionë USD më shumë nga shqiptarët duke e çuar shumën në 430 milionë dollarë në vit. Pra, Edi Rama, 3 vjet më parë erdhi në pushtet me premtimin se shqiptarët do të paguanin më pak taksa dhe iu mori shqiptarëve 1.5 miliardë taksa më shumë.
Ka rritur taksën e gazit, po pse, për t’iu shërbyer qytetarëve?! Jo, sepse shqiptarët po konvertojnë makinat me naftë në makina me gaz se u del me lirë dhe ai po ndihmon klientët e tij, një grusht klientësh në sektorin e hidrokarbureve dhe ndonjë ministër. Mora këtë shembull se rritja e taksave bëhet për të rënduar xhepat e qytetarëve pa iu kthyer atyre asnjë gjë mbrapsht.
Këtë vit, 8 milionë dollar më shuëmë janë vetëm për shpenzime të qeverisë.
Marrim pensionet e pagat. Sa po i rrit? Po i rrit ndërkohë që i ka ngrirë tre vjet. Pensionet po i rrit më pak se ç’është rritur inflacioni, me dekret qeveritar. Në total, një pensionist shqiptar do të ketë fuqi blerëse 7% më të vogël se një vit më pare kurse 15% më të vogël do ta ketë fuqinë mesatare blerëse shqiptari që merr pagë shtetërore. Pra, më shumë taksa, më pak punë dhe më pak fuqi blerëse.
Tha për shëndetësi falas. Po shqiptarët vazhdojnë të paguajnë 367 milionë dollarë për shëndetësinë që jo vetëm s’e kanë marrë falas, por s’kanë marrë as shëndetësi! Kanë marrë barna të shtrenjta dhe skarco dhe nga kamerat po të shihet, spitalet janë kthyer si në mesjetë.
Shtresat në nevojë nuk marrin asnjë qindarkë. Që vitin e parë u tha s’ka punë iknin refugjatë dhe gjysma iku. Ata jetojnë me më pak se me 5 dollarë në vit. Buxheti i vitit 2017 është një buxhet antisocial. Të gjitha ato që thotë për shtresat në nevojë, janë gënjeshtra dhe ai është “qepur” ashtu për t’i vënë vulën pushtetit të Edi Ramës. Merri shumicës dhe jepja pakicës: Bëj pasuri ata me paratë që i merren shumicës.
Deputetët, opozita, do të shpalosin me detaje këtë buxhet antipopullor në fusha të ndryshme.
Alternative jonë, që po e ngremë përditë me qytetarët është krejtësisht e kundërta e kësaj që po bën Edi Rama. Do të ulim taksat, do të vëmë taksën e sheshtë, nuk do t’i çojmë paratë për lukse dhe palma po për shtresat në nevojë. Premtimi im është se asnjë familje nuk do të mbetet pa bukë, ujë e drita. Po ashtu, vendosja e fashës 200 kilovatorë për dritat.
Alternativa jonë është e zhvillimit ekonomik dhe e mirëqënies duke e bërë shtetin garantuesin e ligjit dhe jo xhandar.
Seanca e nesërme nuk është seanca e shpalosjes së alternativës së PD, por autopsia e një regjimi kleptokrat hadutësh dhe kriminelësh që jo vetëm s’ka realizuar asnjë premtim, por ka mbyllur dhe dyert e integrimit të Shqipërisë dhe fajin e gjen tek opozita, tek mediat, tek parlamentarët gjermanë, britanikë, hollandezë po asnjëherë tek vetja. Kjo është simptoma e fundit e një regjimi të izoluar nga realiteti. Nesër opozita do ta bëjë të qartë gjatë gjithë seancës parlamentare.”
