Kanë bërë bujë deklaratat e deputetit gjerman Gunter Krichbaum që ka trazuar skenën politike shqiptare. Krichbaum duke lënë mënjanë diplomacinë ia bëri të qartë Tiranës se nuk ka shanse të hapë negociatat me BE-në pa plotësuar 7 kritere.
Por ky lajm ka sjellë edhe një farë përplasje mes Top Channel dhe Lapsi.al që drejtohet nga Andi Bushati.
Sipas lajmit të TCH, Rama mendoi anulimin e takimit me deputetin gjerman dhe se deklarata e tij ka ardhur për shkak të zgjedhjeve në Gjermani.
“Burime pranë kryeministrit i thanë Top Channel se takimi i zotit Krichbaum me kryeministrin Rama është kërkuar në cilësinë e kryetarit të Komisionit të Çështjeve Europiane të Bundestagut. Por zoti Krichbaum është paraqitur në takim thjesht si deputet i partisë së tij dhe ka qenë shumë e qartë se, opinioni i tij nuk është as opinioni i Kancelares dhe kryetares së partisë, Angela Merkel, as opinioni i Komisionit të Jashtëm që ai drejton, e madje as opinioni i vet grupit të tij parlamentar.
I njëjti burim thotë se kryeministri nuk e ka anuluar takimin në kuadrin e vizitës individuale partiake të zotit Krichbaum, në respekt të kontributit që ai ka dhënë si kryetar i Komisionit për Çështjet Europiane në mbështetje të Reformës në Drejtësi.
Ndërkohë, një burim i dytë siguron se, duke e përcjellë zotin Krichbaum, Edi Rama i ka uruar deputetit gjerman suksese në fushatën e tij të ardhshme elektorale dhe i ka sugjeruar me humor që as të mos e ngatërrojë Shqipërinë me axhendën e fushatës së tij në Gjermani dhe as fushatën e tij të mos e ngatërrojë me fushatën e Partisë Demokratike në Tiranë”, theksohej në lajmin e Top Channel.
Ndërsa Lapsi.al shkruan se kjo është një mënyrë e Ramës për të sfumuar Krichbaumin, duke e nxjerrë atë mik të PD.
“Deputeti gjerman që lëshoi të enjten pasdite disa bomba të forta në Tiranë, Gunter Krichbaum, nuk deshi ta komentoi takimin e tij me kryeministrin Rama. Ai në konferencën e shtypit tha vetëm se e kishte njohur shefin e qeverisë me 7 kushtet që grupi parlamentar i partisë së Angela Merkelit, kishte vënë për të penguar hapjen e bisedimeve mes Tiranës dhe Brukselit.
Por gazetarja Elona Meço e Top Channel ka raportuar disa sekrete “të vjedhura” nga këshilltarët e Ramës mbi atë që është folur mes shefit të komisionit më BE të bundestagut gjerman Gunter Krichbaum dhe kryeministrit. Sipas versionit të Top Channel, Rama i ka thënë bashkëbiseduesit të tij se nuk duhet të përfshijë fushatën e tij elektorale në marrëdhëniet e Shqipërisë me BE (zgjedhjet e përgjithshme në Gjermani zhvillohen pranverën e ardhshme) dhe as të ngatërrojë fushatën elektorale të PD, me këtë temë.
Nga ky informacion i rrjedhur qëllimisht nga kryeministria, kuptohet se në qeveri janë të mërzitur me deklaratat e forta të të djathtit gjerman të bërë në prag të vizitës së Ramës në Berlin dhe se po kërkohet relativizimi i thënieve të tij, duke e paraqitur si një mik të PD”, shkruante Lapsi.al.
