Ish-zv.ministrja e Ekonomisë Brisida Shehaj thotë se ia paraqiti vetë dorëheqjen e saj kryeministrit Edi Rama.
Ajo thotë se ia ka parashtruar zyrtarisht dorëheqjen shefit të kabinetit duke e argumentuar me motive personale.
Por ky argumentim është shumë i përgjithshëm dhe komentet për arsyet e largimit janë të shumta. Komentet ishin nga një përplasje me ministren e Ekonomisë, Milva Ekonomi dhe deri te marrja e një detyre partiake në prag të zgjedhjeve të vitit të ardhshëm ku shehaj mund të ketë një vend në listën e kandidatëve për deputetë.
Shehaj është pyetur nga newsbomb.al ku thotë se dorëheqja e saj lidhet vetëm me arsye personale ndërsa thekson se me ministren Ekonomi ka raporte të shkëlqyera.
“Gjatë punës dy mujore me zonjën ministre, por edhe më herët, e kam vlerësuar për profesionalizmin e saj. Me zonjën Ekonomi kam raporte të shkëlqyera dhe gjithçfarë thuhet lart e poshtë se kam pasur konflikte me të, nuk është e vërtetë. Kjo bëhet për të cënuar integritetin tim dhe të ministres për të cilën gëzoj respekt të veçantë”, – është shprehur Shehaj.
