Ish-drejtoresha e doganave Briseida Shehaj, prej dy muajsh në postin e zëvendës ministres së Ekonomisë, është larguar edhe nga ky pozicion.
Por historia e posteve të bletëve punëtore të kryeministrit Rama nisi me emërimin e dy vajzave në krye të dy drejtorive.
Po ku janë ato sot?
Vetëm dy muaj më parë, me vendim të Kryeministrit Rama, Briseida Shehaj lë detyrën e Drejtoreshës së Përgjithshme të Tatimeve për të marrë zyrën e zv.ministres së Financave.
Sot ajo është zyrtarisht pa punë.
Është prapë kreu i ekzekutivit Edi Rama i cili e shkarkon Briseidën edhe pse arsyet e pakomunikuara, mendohet të kenë të bëjnë me një përfshirje të saj në listat e deputetëve për zgjedhjet e ardhshme.
Tre vjetorin e Briseidës në krye të Tatimeve, e ndërpreu emërimi i Vasilika Vjeros, e cila tre vitet paraardhëse ka drejtuar Qendrën Kombëtare të Biznesit. Ajo ka mbajtur detyrën e drejtores së Taksave në Bashkinë e Tiranës, në kohën kur kjo e fundit drejtohej nga Edi Rama.
Shkarkimet që mbajnë firmën e kryeministrit kanë prekur edhe doganat, ku është larguar Pranvera Fagu, e cila prej një viti në pozicionin e drejtoreshës së përgjithshme, tashmë do të drejtojë QKB-në.
Por posti i kreut të doganave, fillimisht i mbajtur nga ish-FRESH-istja Elisa Spiropali ishte një prej emërimeve më të përfolura të kohës, së bashku me atë të Shehajt në krye të Tatimeve. Kjo edhe për shkak të gjuhës së përdorur nga kryeministri gjatë zyrtarizimit të vajzave të tij.
Por nuk vonoi dhe FRESH-istja Spiropali, njoftoi metamorfozën e rradhës.
Dorëheqjen e saj nga posti i drejtoreshës së Doganave në mars të 2015-ës e njoftoi përmes rrjetit social Facebook, se sapo kishte humbur kriterin plus të kryeministrit Rama.
Sot sekretare për rininë dhe zëdhënëse e kryesisë për selinë vjollcë, Spiropali duket se lëvron mes posteve, mbase të përshtatshme për një nënë. /ABC News
