Ka mbetur sërish jashtë seancës së Kuvendit shqyrtimi i ligjit për lejimin e importit të mbetjeve. Deputetët kanë në axhendën e tyre dekretin e presidentit të Republikës, Bujar Nishani, për kthimin në Kuvend të ndryshimeve në ligjin për manaxhimin e integruar të mbetjeve, që i hapte rrugë edhe importit të tyre.
Megjithatë prej disa seancash, Kuvendi nuk e ka parashikuar diskutimin e dekretit në seancën plenare.
Kryetari i Kuvendit, Ilir Meta, ka firmosur sot edhe urdhrin që përcakton rendin e ditës të seancës së të enjtes, ku nuk është përfshirë diskutimi i dekretit të Nishanit. Ligji u miratua rreth 2 muaj më parë me vetëm 63 vota, ndërsa shumica parlamentare ende nuk ka një qëndrim të unifikuar se si do të veprohet me dekretin e Kreut të Shtetit.
Aleanca Kundër Importit të Plehrave njoftoi dje se ligji pritej të shqyrtohej nga deputetët në seancën e 24 nëntorit, duke paralajmëruar edhe kundërshtimin e tij. AKIP kundërshtoi edhe një deklaratë të deputetit socialist, Eduart Shalsi, sipas të cilit, Komisioni Europian ishte shprehur pro ligjit për importin e mbetjeve.
Për AKIP, deklarata e Shalsit vjen “pikërisht tani në orët e fundit të marrjes së vendimit të pritshëm të Kuvendit, vendim që shqiptarët e kanë thënë me vendosmëri të palëkundur prej vitesh dhe sot më shumë se kurrë fjalën e tyre, për ndalim të çdo lloj importi të mbetjeve në territorin e Republikës së Shqipërisë”.
Rendi i ditës
1 – Miratimi i procesverbalit të seancës plenare të datës 17.11.2016.
2 – Njoftimi i projektligjeve të depozituara në Kuvend.
3- Projektligji “Për disa ndryshime dhe shtesa në ligjin nr. 9363, datë 24.3.2005 “Për mënyrën dhe procedurat e vendosjes dhe kalimit të forcave ushtarake të huaja në territorin e Republikës së Shqipërisë, si dhe për dërgimin e forcave ushtarake shqiptare jashtë vendit”, të ndryshuar.
4 – Projektligji “Për zhvillimin e rrjeteve të komunikimeve elektronike të shpejtësisë së lartë dhe sigurimin e të drejtës së kalimit”.
5- Projektligji “Për shërbimet e kujdesit shoqëror në Republikën e Shqipërisë”.
6- Projektvendim “Për zgjedhjen e znj. Gentjana Sula Kryetar i Autoritetit për Informimin mbi Dokumentet e ish-Sigurimit të Shtetit” (votim me shumicë të thjeshtë).
7 – Njoftimi/miratimi i projektprogramit të punimeve të Kuvendit për periudhën 30 nëntor –24 dhjetor 2016.
8 – Njoftimi/miratimi i projektkalendarit 3-javor të punimeve të Kuvendit për periudhën 30 nëntor –16 dhjetor 2016.
9 – Për votim: Projektligji “Kodi hekurudhor i Republikës së Shqipërisë”.
10 – Diskutime për çështje jashtë rendit të ditës.
