“Kam menduar se është një punë që kërkon sinqeritet, mbajtjen e fjalës së dhënë, premtimin, që do të kesh të bësh me njerëz të vullnetit të mirë në qarqet politike, por kisha gabuar. Sinqerisht, ta dija që në fillim se politika ishte e këtij soji, nuk do të kisha hyrë”.
Kështu është shprehur biznesmeni i njohur shqiptar, Behgjet Pacolli, dikur President i Republikës së Kosovës, për një periudhë të shkurtër. Ai e ka cilësuar hyrjen e tij në politikë si punë të jashtëligjshme dhe kontaktin me njerëzit e politikës në Kosovë si eksperiencën, që nuk do të donte ta kishte përjetuar kurrë. I ftuar në “Xing me Ermalin” në “TV Klan”, kur u pyet nëse ka bërë ndonjëherë një punë të jashtëligjshme, z.Pacolli u përgjigj se:
“Po… shembull: që hyra në politikë! Ishte krejtësisht e jashtëligjshme”.
Ai ka shpjeguar këndvështrimin që kishte pasur për politikën deri në momentin kur ishte bërë pjesë e saj.
Biznesmeni Pacolli pohoi se është zhgënjyer sinqerisht në politikë dhe, siç shprehet ai, “njerëzit më të paskrupullt që kam takuar në jetën time, i kam takuar në politikë. Njerëz që nuk janë falënderues (mirënjohës), njerëz egoistë, që mendojnë vetëm për veten, njerëz që nuk dinë se çfarë është premtimi, çfarë është fjala e dhënë dhe kjo është e trishtueshme”. Ai u tregu ai kujdesshëm që të mos i përfshijë të gjithë në një kategori. I pyetur si ishte e mundur që ai ishte politikani më i ndjekur, me 500 mijë fansa në rrjetet sociale dhe nuk ishte kryeministër i Kosovës, z.Pacollli u përgjigj me shaka se “ka kohë, jam ende i ri dhe me energji”. Ai ka bërë dallimin mes mirënjohjes që gjen në Shqipëri dhe një lloj mosmirënjohjeje në Kosovë Duke treguar për udhëtimet e tij, z.Pacolli, i cili lëviz me avion provat, tha se në shumë vende të Europës që lëviz, po ashtu edhe në Shqipëri, nuk ia kontrollojnë pasaportën. Në Kosovë e ndalojnë sa herë që hyn dhe del nga vendi. Edhe disa herë brenda ditës nëse lëviz shpesh. Z.Pacolli, i cili në Shqipëri ka marrë medaljen e mirënjohjes së lartë “Nder i Kombit” nga Presidenti Bujar Nishani, tha se nga Kosova nuk ka marrë asnjë mirënjohje me gjithë përpjekjet dhe të mirat që ka bërë. “Në Kosovë sigurisht nuk kam asnjë mirënjohje prej askujt, për arsye se ndoshta njerëzit nuk dua të them të këqij, por më të prishurit në shpirt janë ata të cilët udhëheqin institucionet politike. Unë gjithnjë kam thënë se… nëse unë jam në politikë, ta ndihmoj atë tjetrin, nëse është edhe ai duke bërë një punë të mirë, që të më ndihmojë në kthim. Por jo të pengohesh nëse je duke bërë një punë të mirë. Këto janë përjetimet e mia, që nuk kam dashur kurrë t’i përjetoj në skenën politike”, u shpreh z.Pacolli. I ngacmuar për të ardhur në Shqipëri, ai tha se një mik i tij politikan në Shqipëri i ka sugjeruar të mos e bëjë, sepse do të jetë konkurrent pastaj. Dhe ai vetë tha se “Kam respekt shumë të madh për njerëzit e biznesit në Shqipëri dhe për të dy anët e politikës. Me përfaqësuesit e institucioneve kam relacion shumë të mirë dhe hyrja ime në një aventurë të tillë do t’i prishte këto marrëdhënie dhe për hir të eksperiencës në Kosovë, nuk do ta bëja atë dhe miqësia ime me miqtë këtu në Shqipëri do të jetë përgjithmonë”.
