Në prani të qindra anëtarëve të PS-së dhe simpatizantëve të pakënaqur me mënyrën sesi po qeveriset vendi nga Edi Rama, ish- deputeti socialist Koço Kokëdhima në Sarandë ka analizuar edhe situatën aktuale brenda PS-së, përpara zgjedhje të ardhshme parlamentare.
Sipas tij, zgjedhjet e disa klaneve në pushtet, marrëdhënia me aleatët dhe premtimet e pa mbajtura rrezikojnë humbjen e zgjedhjeve vitin tjetër.
“Partia Socialiste po kanibalizohet nga aleatët, po humbet mbështetje dhe po zvogëlohet. Në zgjedhjet e vitit 2017, Partia Socialiste rrezikon të mos arrijë dot e vetme numrin 60 të deputetëve të saj. Kjo po ndodh edhe pse kemi kaq shumë njerëz të shkëlqyer në bazë… Kjo gjë po ndodh, pasi Partia Socialiste po merr kosto të pamerituara nga njerëzit e saj në pushtet. A është normale që qeveria jonë të harrojë premtimet e saj kundër plehrave në zgjedhjet e vitit 2013 dhe tani të miratojë importin e mbetjeve?”, deklaroi Kokëdhima në fjalën e tij.
Ai tha gjithashtu, se nuk është e drejtë që PS të marrë kosto nga deklaratat e Ramës kundër presidentit të sapozgjedhur të SHBA, Donald Trump, apo industria e kultivimit ilegal të kanabisit.
“Përse duhet t’i japim kosto të pamerituara Partisë Socialiste dhe vendit me deklarata diletante e poshtëruese të zyrtarëve tanë kundër kandidatit dhe tani presidentit të zgjedhur të SHBA-ve, zotit Donald Tramp? A duhet që një qeveri socialiste, pasi sulmon Lazaratin, e bën gjithë vendin Lazarat? Si ka mundësi që në trafikun e ri të hashashit përfshihen të gjithë ata funksionarë të policisë dhe të shtetit? A i meriton PS-ja këto kosto? Ne duhet të bënim marijuanën të legalizuar për fermerët dhe për shtetin, për buxhetin, jo për zyrtarët e kriminalizuar dhe për mafiozët e drogës”,- tha përpara mbështetësve të tij të shumtë.
Sipas tij, zgjidhja e vetme është që socialistët e thjeshtë dhe qytetarët të kenë më shumë kontroll për politikat e qeverisë dhe vendimmarrjet më të rëndësishme të ndahen me socialistët e bazës dhe me qytetarët e vendit.
“Udhëheqja e partisë nuk është e përgatitur për këtë, nuk ka vullnet, sepse nuk dëshiron ta pranojë përtëritjen e vet, sepse kështu një pjesë e madhe e drejtuesve të saj të sotëm do të duhet ta lënë politikën”, tha Kokëdhima duke sulmuar hapur ish mikun e tij Edi Rama edhe pse nuk ja ka përmendur asnjëherë emrin gjatë fjalimit në Sarandë.
