Nicole Kidman thotë se pasi i ka parë femrat dhe fëmijët, që ishin viktima të luftës në Kosovë, kishte vendosur që njëra nga gjërat më të rëndësishme në jetë ishte t’i ndihmonte ato viktima.
Kjo aktore e filmit, fituese e shumë çmimeve prestigjioze, tha mbrëmë në New York, gjatë ceremonisë së shënimit të 20 vjetorit të Fondit të Kombeve të Bashkuara për ndaljen e dhunës kundër grave, se prej para 10 vitesh ka filluar të angazhohet dhe do të “jetë zë për femrat që nuk kanë zë”, raporton AP.
Aktorja e njohur amerikane, që është ambasadore e vullnetit të mirë për Gratë e Kombeve të Bashkuara, ka kërkuar prej mysafirëve në këtë ceremoni që ta ndihmojnë materialisht, pasi femrat dhe vajzat “kanë nevojë për ne, që kemi mundësi dhe që kemi para t’i ndihmojmë ato”.
Organizata Gratë e Kombeve të Bashkuara tha se në këtë darkë janë tubuar më se 105 mijë dollarë, përfshirë donacionin prej 50 mijë dollarëve nga aktorja, Nicole Kidman.
Kjo e fundit kujtojmë se kishte vizituar Kosovën në vitin 2006, ku ishte takuar me disa gra kosovare dhe personalitete të ndryshme.
