Prokurorët rumunë thonë se kryetarja e Komisionit Qendror të Zgjedhjeve të vendit, Ana Maria Patru, u arrestua pasi mori ryshfete të majme për të dhënë kontrata për kompanitë e teknologjisë së informacionit si dhe për të ndërmjetësuar për takime mes kompanive dhe ministrave.
Nga Ana Maria Touma / BIRN / Bukuresht
Prokurorët në Drejtorinë Kombëtare Antikorrupsion të Rumanisë arrestuan të martën kryetaren e Autoritetit të Përhershëm Zgjedhor të vendit, Ana Maria Patru dhe e akuzuan atë për ushtrim ndikimi të paligjshëm dhe pastrim parash.
Patru, 40 vjeç, përballet me tri akuza për ndikim të paligjshëm dhe dy akuza për pastrim parash të kryera mes viteve 2007 dhe 2015.
Sipas prokurorëve, Patru pranoi 210 mijë euro ryshfet në vitin 2009, të cilat i përdori për të blerë një shtëpi në Bukuresht dhe 65 mijë të tjera në vitin 2011, të cilat i përdori për të blerë makinë e gjëra të tjera.
Në shkëmbim të parave, ajo akuzohet se ndërhyri për t’i dhënë kontrata kompanive të teknologjisë së informacionit si dhe premtoi se do t’i mbështeste ato në tenderë të tjerë në të ardhmen.
Pjesë e pazarit të dyshimtë është edhe ndërmjetësimi për kontrata mes kreut të kompanisë së teknologjisë dhe Ministrit të Ekonomisë, thonë investitorët. Pajisjet e blera për zgjedhje tashmë janë nën hetim.
Patru u mor në pyetje të majtën ndërkohë që prokurorët bastisën zyrat qendrore të komisionit të zgjedhjeve në Bukuresht si dhe disa nga shtëpitë e Patru. Ajo u ndalua pas kësaj për 24 orë.
Avokati i saj deklaroi për mediat se ajo sakaq ka dhënë dorëheqjen nga posti.
Prokurorët thanë se kanë kryer kontrolle edhe në tri vende të tjera si dhe kanë arrestuar bashkëshortin e saj, ndërkohë që ky i fundit po përpiqej të arratisej bashkë me dokumente që i përkisnin një kompanie private.
Hetimi për korrupsion vjen në një kohë kur Rumania po përgatitet për zgjedhje të përgjithshme që do të zhvillohen më 11 dhjetor. Patru ka qenë kryetare e komisionit që nga viti 2012 kur u emërua nga parlamenti me mbështetjen e ish-presidentit Traian Băsescu dhe partisë së tij Demokrate Liberale.
Nga viti 2007 deri më 2012 ajo qe zëvendëskryetare e komisionit.
