Edhe pse kryeministri ndodhet në New York mesa duket ai e ka lënë të regjistruar videon e tij në kryeministri në komunikimin e përjavshëm në Facebook.
Rama i është rikthyer sulmeve ndaj Sali Berishës duke thënë se kur Shqipëria e kishte kryeministër, ajo kishte një imazh të keq dhe kreu i qeverisë kishte humbur respektin e të huajve.
Gjithashtu, Rama thotë se politika e jashtme e vendi ishte e papërfillshme, ndërkohë që thekson se tani dinamika e re i ka rritur kuotat e vlerësimit të Shqipërisë.
“Tre vjet më parë Shqipëria ishte një vend i refuzuar tre herë me radhë, në tre vite rresht në përpjekje për të marrë statusin e vendit kandidat për në BE. Një shtet i pa reformuar me imazh të keq ndërkombëtar, me një kryeministër që kishte humbur çdo respekt ndërkombëtarisht dhe që prej disa vitesh nuk e qaste më askush në derë, me një politikë të jashtme pa asnjë peshë në rajon, lërë më pastaj për respekt në Evropë”, u shpreh Rama.
Kryeministri vijoi më tej se në tre vite qeveria e drejtuar prej tij mori statusin kandidat dhe tani pret që të hapë negociatat për integrimin në BE. Rama gjithashtu kritikoi edhe sjelljen e Partisë Demokratike në Parlamentin Evropian duke thënë se qëllimi i saj është të vonojë reformën në drejtësi dhe integrimin në BE.
“Opozita jonë po na turpëron të gjithëve në sytë e familjes evropiane me broçukullat e saj për Kanabistanin, dhe me për stanin e lepujve që e përfaqëson për fatin tonë më të keq”, shprehet Rama.
Kreu i qeverisë nga ana tjetër tha se qeveria ka shumë për të përmirësuar ashtu si edhe ai vetë në detyrën e Kryeministrit dhe pë këtë tha si shtrij dorën dhe opozitës, duke i kërkuar asaj që të bëjë detyrën që i takon. “Edhe për opozitën dora është e shtrirë dhe mbase jo gjithçka është vetëm në dorën e saj, kështu që do të reflektojnë dhe do të reflektoj çfarë mund të bëjmë ne vetë më shumë që ta ndihmojmë opozitën të futet në rolin e saj, të rikthehet në detyrën e saj, të rivendoset në vendin e lënë bosh prej tre vjetësh”, përfundoi Rama.
