Presidenti Bujar Nishani ka mbledhur sot Këshillin e Sigurisë Kombëtare, në fokus të të cilit ka qenë çështja e kultivimit të kanabisit.
Të pranishëm në mbledhje kanë qenë zv.kyreministri Niko Peleshi, ministri i Brendshëm Saimir Tahiri, ai i Drejtësisë Ylli Manjani, ministrja e Mbrojtjes Mimi Kodheli, kryeprokurori Adriatik Llalla, kreu i SHISH Visho Ajazi Lika, drejtori i përgjithshëm i policisë, Haki Çako dhe zyrtarë të tjerë.
Kreu i SHISH, drejtori i Policisë së Shtetit, por dhe ministri i Brendshëm ata që kanë raportuar përpara kreut të shtetit lidhur me situatën e kanabisit në vend.
Në fund të mbledhjes ka qenë zv.kryeministri Niko Peleshi që ka bërë një deklaratë për mediat.
Në prononcimin e tij, Peleshi ka theksuar se çështja e kanabisit dhe debatet për të duhet të bazohen tek të dhënat zyrtare dhe jo tek perceptimet që i japin karakter politik.
“Do të ngremë në një nivel tjetër luftën kundër këtij fenomeni, që nuk lindi sot e as do të mbarojë nesër. Brenda fundit të janarit do të hartohet një strategji integrale kundër kanabisit, duke mundësuar parandalimin e kultivimit dhe duke ofruar incentivë për të varfërit që shpesh kriminalizohen”, tha Peleshi.
