Gjykata e Tiranës ka dënuar me 10 vjet burg një 32-vjeçar të akuzuar për “mashtrim”. Sipas Gjykatës, i pandehuri Kreshnik Kule ka përfituar shuma të konsiderueshme parash, që shkojnë deri në 18 mijë euro dhe 20 mijë dollarë, duke i premtuar një shtetasi për t’i mundësuar atij emigrimin drejt Kanadasë.
Referuar vendimit të Gjykatës, Kule bashkë me të atin e tij, i cili është gjykuar në një proces të veçuar për akuzën e “ndihmës për kalim të paligjshëm të kufijve”, në shkurt të vitit 2008 kanë marrë përsipër të dërgonin në Kanada shtetasin A.S, raporton “Panorama”.
Për këtë qëllim i pandehuri i ka kërkuar atij si fillim një shumë prej 1 mijë eurosh dhe një foto personale. Në një nga takimet e mëvonshme, babai i të pandehurit i ka dhënë të dëmtuarit A.S. pasaportën, në të cilën ishte hedhur një vizë për në Republikën Domenikane, që, sipas tyre, do të shërbente si vend tranzit për të shkuar në Kanada.
Për këtë shërbim, A.S. i ka dhënë babait të të pandehurit 3 mijë euro dhe më pas, një shumë tjetër prej 4 mijë eurosh. Në datën 21 nëntor 2018, i dëmtuari ka udhëtuar drejt Turqisë dhe një ditë më vonë, i shoqëruar edhe nga i pandehuri Kreshnik Kule, drejt Republikës Domenikane. Kallëzuesi dhe i pandehuri Kreshnik kanë qëndruar në pritje gati një muaj, kohë kur aty ka mbërritur babai i të pandehurit, si edhe një shtetas bullgar, P. Dimitro.
Për dy muajt në vijim kallëzuesi A.S. është mashtruar duke iu premtuar se do të nisej për në Kanada nga dita në ditë e duke përdorur justifikime nga më të ndryshme në pritje të largimit. Pasi nuk kanë realizuar premtimin, i pandehuri Kule është larguar duke e lënë kallëzuesin bashkë me shtetasin bullgar, i cili është larguar pak ditë më pas.
I mbetur vetëm, kallëzuesi pas peripecish të shumta ka mundur të kthehet sërish në Shqipëri. Ai ka tentuar të takohet me babain e të pandehurit, por nuk ka mundur.
“Për të realizuar kalimin në Kanada, kallëzuesi dhe motra e tij D. u kanë dhënë të pandehurve cash dhe nëpërmjet bankës shumat 16.000 euro dhe 10.000 dollarë amerikanë. Edhe gjatë qëndrimit në Republikën Domenikane, kallëzuesi ka marrë nga familjarët e tij shumat prej 12 mijë eurosh dhe 10 mijë dollarë amerikanë, i cili nga ana e tij ua ka dhënë të pandehurve për realizimin e qëllimit të tij, kalimin për në shtetin kanadez”, thuhej në vendimin e Gjykatës.
Në vendimin e fajësisë, Gjykata arsyetonte se i pandehuri Kreshnik Kule ka mashtruar përmes përdorimit të gënjeshtrës e krijimit të rrethanave të rreme, fiktive, duke i marrë atij e kthyer në favorin e vet shuma të konsiderueshme të hollash. /Panorama/
