Ambicia e shpallur së fundmi nga Ilir Meta që Lëvizjes Socialiste për Integrim për të qenë ose forcë kryesore në qeveri ose e para në opozitë, duket se kanë trazuar keq ujërat brenda Partisë Socialiste.
Deklaratat e kreut të LSI, Ilir Meta, të pasuara në masë edhe nga dy kandidatët për postin e kësaj partie, Shezai Rrokaj dhe Përparim Spahiu, se LSI do të jetë forcë kryesore në 2017 dhe se i takon posti i Kryeministrit, nuk janë pritur aspak mirë nga grupi parlamentar i Partisë Socialiste, raporton “Sot”.
Në mbledhjen e djeshme të grupit parlamentar të PS, deputetët kanë shpërthyer në akuza të forta kryesisht ndaj deklaratave të Shezai Rrokajt dhe Përparim Spahiut, duke iu kërkuar që të ndalin sulmet ndaj aleatit më të madh të koalicionit, PS dhe kryeministrit Edi Rama.
Ka qenë deputeti Erion Braçe ai që e ka ngritur me të madhe shqetësimin për sulmet e vazhdueshme ndaj PS, nga dy kandidatët për kreun e LSI, Rrokaj dhe Spahiu. Sipas burimeve, mësohet se Braçe ka kërkuar që dy kandidatët gjatë fushatës së tyre për postin e kreut të LSI, nuk kanë asnjë të drejtë të atakojnë aleatin e tyre.
Ai ka hedhur dyshime se këtë e bëjnë ose për të rënë në sy në partinë e tyre, ose për të shigjetuar PS duke vënë në pikëpyetje vijimin e bashkëpunimit. “Kandidatët për kreun e LSI nuk kanë të drejtë të sulmojnë aleatin e tyre gjatë fushatës së tyre. Për çfarë e bëjnë? E bëjnë ose për të rënë në sy në partinë e tyre ose bjeri pragut të dëgjojë dera!”, mësohet të jetë shprehur Braçe, dje në mbledhjen e grupit parlamentar të PS.
