Ka qarkulluar thuajse në të gjitha media online sot një lajm, se ministri i brendshëm, Saimir Tahiri i kishte marrë në telefon i shqetësuar një tifoze të partizanit që kishte shkuar një status në Facebook për dhunën e ndodhur në stadiumin e Elbasanit gjatë ndjeshjes Partizani – Skënderbeu.
Orjona Braimllari shkruante në adresën e saj të rrjetit social se ministri i kishte kërkuar numrin në Facebook dhe e kishte marrë në telefon duke i thënë se kishte qenë i shqetësuar ngaqë kishte menduar se Orjona kishte rënë pre e dhunës.
“Pas statusit të djeshëm, zgjohem me këtë sms nga Ministri Saimir Tahiri. I dërgova numrin. Jo më shumë se pesë minuta bie telefoni. Zoti Ministër ishte i shqetësuar për statusin që kisha postuar…donte të dinte më shumë rreth ngjarjes…” shkruan Orjona Braimllari, duke thënë se i kishte sqaruar ministrit se nuk kishte qenë në stadium, por e kishte perceptim nga ajo çka kishte parë.
Në fakt, nga dhuna në stadium ndjenjat i humbi një tjetër tifoze. Ky sqarim i Orjonës zbulon një gafë të ministrit të Brendshëm, pasi ai ka telefonuar personin e gabuar, vajzës që as që ka qenë fare në stadium.
Telefonata të tilla nga ministrat e figurat e PS janë bërë të modës.
Duke u përpjekur t’u gjendet pranë personave në nevojë, Tahiri po ecën në rrugën që kanë shtruar të tjera figura të Partisë Socialiste, si Erion Veliaj që s’lë të moshuar e kalamaj pa puthur e përqafuar vetëm për propagandë apo si Ilir Beqaj që u dërgon mesazhe telefonike atyre që janë në botën tjetër për t’i pyetur si u është dukur shërbimi në QSUT. /Lapsi.al/
