E ndërsa kryeministri Edi Rama fliste plot duf për mediat online pasi këto të fundit kritikojnë qeverinë, ka bllokuar në Facebook edhe një gazetar. Po pse? Për arsyen e thjeshtë, se pyetjet e gazetarit Ilir Sinanaj që tregonin të vërtetën e shqetësonin kryeministrin. E ndërsa me gazetarin e gjeti zgjidhjen duke e bllokuar nga faqja e tij në Facebook, tashmë problemi i Ramës është se si tu mbyllë gojën edhe medieve online.
Më poshtë debati mes Ramës dhe gazetarit që shkaktoi bllokimin e Ilir Sinanajt nga faqja e kryeministrit në Facebook.
Gazetari Ilir Sinanaj: Z. Kryeministër i Republikës së Shqipërisë! Pas kësaj videoje, që ju dëgjova, ndjej trishtim për nivelin e ulët të mesazhit ku kreu i qeverise së shtetit tim flet për klikime në FB, kur ka çështje problematike pa fund! Por kjo është e drejta juaj sepse është faqja juaj e FB. Gjithsesi dua t’ju kërkoj diçka si gazetar! Jepu leje ekspertëve të tu më të mirë të debatojnë ligjin për importin e mbetjeve, duke filluar nga Eduard Shalsi, Besnik Bare, Ervin Bushati etj e cilindo nga LSI, në dalje publike. Gjykimin le ta japë publiku. Së dyti nëse vërtet jeni të interesuar për nivelin që ka degraduar në media, ju ftoj të ngremë grup pune për të diskutuar një projektligj për “Statusin e Gazetarit”! Faleminderit për mirëkuptimin! Po e mbyll me një nga gjërat më me vlerë që keni thënë gjatë gjithë karrierës suaj politike (ndoshta e vetmja, gjithmonë sipas mendimit tim): “Varfëria e aspiratave është më e rëndë se varfëria e xhepave”. Ju këshilloj te thelloheni tek kjo shprehje e të bëni një vlerësim të njerëzve që ju rrethojnë dhe që punojnë në administratë!
Kryeministri Edi Rama: Së pari, i dashur Ilir mos u trishto pa arsye, sepse unë s’kam folur për klikime po për audiencë dhe reagime, dmth shikues aktivë të një debati. Së dyti, nëse ty kjo çështje s’të duket problematike, nuk habitem fare sepse nuk je as i pari as i fundit, që ky problem i madh shoqëror s’të duket problem, po mua dhe mesa duket një opinioni shumë më të gjerë se sa i imi i duket një problem i madh. Se treti, unë vetë nuk e kuptoj çfarë ka akoma për të debatuar për ligjin e mbetjeve, aq më tepër kur edhe vete komisioni europian është shprehur shumë qarte për nevojën e tij, por padyshim që nëse ka ende interes për këtë debat nëpër media njerëzit tanë nuk do të mungojnë. Se katërti, me shumë dëshirë do të dëgjonim sugjerime për statusin e gazetarit dhe së pesti, varfërinë e aspiratave nuk e kam vuajtur kurrë të siguroj, në asnjë gjë që kam bërë e bëj! Gjithë të mirat.
