Një tregtar në qytetin e Korçës ka rënë pre e grabitësve të maskuar. Banesa e tij është grabitur gjatë natës së shtunë duke gdhirë e diel.
Sipas Policisë kanë qenë tre persona të maskuar që kanë hyrë me armë nga dhoma e gjumit në banesën e biznesmenit në fshatin Lumalas.
“News24” duke iu referuar burimeve pranë Policisë raporton se dyshohet se janë grabitur 10 milionë lekë si dhe 60 mijë paund.
NJOFTIMI I POLICISE:
Në datë 30 tetor 2016, rreth orës 03:00, policia u njoftua se në fshatin Lumalas, Korçë, ne banesën e shtetasit I.Sh, 60 vjeç, kanë hyrë 3 persona të maskuar.
Nga hetimet paraprake, dyshohet se autorët kanë hyrë në dhomën e gjumit dhe nën presionin e armës kanë mundur të marrin ne dy kasaforta një shumë parash.
Shtetasi I.Sh, ka një aktivitet privat në fushën e tregtisë.
Në momentin kur ka ndodhur ngjarja, në banesë ndodheshin vetëm çifti i bashkëshortëve.
Lidhur me ngjarjen, grupi hetimor po kryen verifikimet përkatëse, po punohet për identifikimin dhe kapjen e autorëve, si edhe zbardhjen e rrethanave të ngjarjes.
