NGA KLODIAN TOMORRI
Unë nuk ndjek politikane në “Facebook”. Por sot pashë se mediat kishin publikuar një status të Ministres së Zhvillimit Ekonomik, Milva Ekonomi për ecurine e pagave në administratë.
Ministrja shkruan se pagat reale në shtet gjatë periudhës 2014-2015 janë rritur me 2.2 për qind duke referur të dhenat e INSTAT. Kjo është një deklarate hileqare sepse qëllimisht anashkalon një detaj kyc.
Supozoni një administratë me 100 vetë, ku çdo punëtor paguhet nga një lek. Në total fatura e pagave është 100 lekë. Vitin tjetër 2 prej punonjësve të administratës u dyfishohet rroga dhe nga 1 lek u shkon 2 lekë. Rrjedhimisht fatura totale e pagave shkoi në 102 lekë.
Statistikisht mund të thuhet se 100 punonjësve u është rritur rroga me 2 për qind. Por në të vërtetë, rroga është rritur vetëm për 2 punonjës, 98 të tjerët s’kanë marrë asgjë.
Kjo ka ndodhur në Shqipëri.
Rritja me 2.2 për qind e pagës reale në shtet që përmend ministrja është rezultat vetëm i rritjes së ndjeshme që kanë marrë policët dhe rangerat e parkut të Divjakës për meritën se rikthyen lejlekun kacurrel.
Ndërsa 98 për qind e punonjësve të shtetit në dy vitet që përmend zonja Ekonomi, jo vetëm s’kanë përfituar asnjë rritje rroge, por kanë parë pagat reale të tyre t’ju bien me 5-6 për qind për shkak të inflacionit.
Ky është hesapi i ndershëm dhe një ish-drejtoreshe e INSTAT duhet të jetë pak më e ndrrshme me statistikat.
