Partia Demokratike ka denoncuar faktin se agjencia shtetërore që sipas kryeministrit Edi Rama do të mbrojë vendin nga plehrat, në fakt ka tre vite që e shkel ligjin.
Në një deklaratë për median, kreu i Departamentit të Mjedisit në PD, Jamarbër Malltezi denoncoi Agjencinë Kombëtare të Mjedisit duke përdorur një raport të Shoqatës së Gazetarëve për Drejtësi.
Deklarata e plotë e Jamarbër Malltezit:
Edi Rama rreket t’u mbushë mendjen shqiptareve se Agjencia Kombëtare e Mjedisit (AKM) do na garantojë për importin e mbetjeve, pasi ajo ka rritur kapacitetet e përralla të tjera.
Por kjo Agjenci del se ka shkelur brutalisht disa ligje dhe konventa ndërkombëtare për mbrojtjen e mjedisit përgjatë 3 viteve të fundit.
Shoqata e Gazetareve për Drejtësi (në një raport të financuar nga Ambasada Amerikane) ka vlerësuar lejet mjedisore të dhëna për ndërtim HEC-esh nga Janar 2014 deri në Qershor 2016, ku është zbuluar se për 38 HEC-e (nga 43 në total), miratimi është dhënë pa kryer fare Vlerësimin e Ndikimit në Mjedis të tyre!
Të dhënat që mungojnë përfshijnë gjatësinë e lejuar e devijimit të lumit, ndërkohë që asnjëri nuk përmban kushtet për masat që duhen marrë për mbrojtjen e habitateve dhe llojeve biologjike që do ndikohen nga projekti i miratuar.
Pra, Agjencia që sipas Ramës do na mbroje nga mbetjet e rrezikshme po shkel ligjet e biodiversitetit dhe te menaxhimin të integruar të burimeve ujore, si edhe disa Konventa ndërkombëtare, si ajo e Bernës dhe e Bonit, të dyja të nënshkruara nga Shqipëria.
Ironia shtohet kur mendon që në 2014, Aleanca e Plehrave futi duart dhe ndryshoi ligjin për lejet mjedisore të hartuar nga BE, veç për të detyruar edhe dyqanet e vogla te lagjeve të banimit të marrin leje mjedisore pas kryerjes se detyrueshme të vlerësimit mjedisor.
Këtu kam një proces-verbal të nënshkruar nga zuzarët e qeverisë që terrorizojnë një fast-food veç 6m2 me 5 milionë lekë gjobe nëse nuk do paguaje për vlerësim dhe leje mjedisore tek sekserët e qeverise.
Pra, Aleanca e Plehrave jep leje mjedisore pa proces të Vlerësimit të Ndikimit në Mjedis për HEC-e, që cenojnë qindra hektarë dhe ndryshojnë rrjedhën ujore për dhjetëra km (përfshi HEC-e ne Valbone, Librazhd dhe Korçe), por detyron kthinat e qofteve me 5m2 të kryejnë VNM dhe të pajisen me leje mjedisore!
Rilindasit janë sulur nëpër dyqane dhe biznese si hiena për ryshfete, duke keqpërdorur ligjin e lejeve mjedisore.
Te gjitha këto janë kriminale.
Partia Demokratike:
Denoncon shkeljet flagrante te ligjeve dhe konventave mjedisore nga qeveria per miratimin e HEC-eve pa VNM.
I bën thirrje prokurorisë të hetoje për këto shkelje.
Kërkon studime të thelluara për ndikimet mjedisore të çdo ndërhyrje madhore në mjedis.
Shqipëria do jetë me mirë pa Aleancën e Plehrave.
