Ministri i Brendshëm, Saimir Tahiri ka pranuar sot dështimin e policisë për ruajtjen e pikave të karburanteve nga grabitjet.
Ai tha se nga viti 2011 në 2016 janë regjistruar 170 grabitje, nga të cilat janë zbuluar 40 për qind e tyre.
Për këtë arsye, ministri i Brendshëm ka propozuar vetëshërbim në pikat e karburanteve gjatë orëve të natës.
Tahiri propozoi se duhet të eliminohet komunikimi me para në dorë gjatë natës, mes operatorit të shitjes së karburantit dhe klientit. Së bashku me vendosjen e kamerave, Tahiri i konsideroi këto dy elementë si masat më të domosdoshme.
“E para dhe më e domosdoshmja është eliminimi i parave cash gjatë natës në të gjitha pikat e karburanteve në Shqipëri dhe kjo të bëhet duke përdorur teknologjinë dhe duke përdorur mundësinë që paratë mos i mbajë në xhep operatori shitës i karburantit, por të paktën gjatë natës të jenë pjesë komunikimit që ka qytetari, konsumatori me një automat elektronik që garanton siguri maksimale.
E dyta masë e domosdoshme është sistemi i kamerave. Thuajse të gjithë pa përjashtim sot keni bërë investimet tuaja personale për të pasur një sistem kamerash për të pasur në çdo pikë karburanti. këtë e keni bërë si pasojë e vetëdijes tuaj se duhet ky investim për të qenë më të siguritë. Thuajse të gjithë e keni bërë këtë mbi bazën e njohurive personale apo profesionale pa një konsultim me policinë, sepse kjo çështje nuk ka qenë as në vëmendjen e policisë më parë”, tha ministri i Brendshëm.
Tahiri propozon gjithashtu që me anë të teknologjisë, në pikat e karburantit të bëhet identifikimi i targës së makinës, nëse është e flasifikuar apo jo.
