Mesila Doda, Albana Vokshi dhe Majlinda Bregu kanë propozuar një ligj të ri për mësuesit e arsimit parashkollor, të arsimit fillor dhe të arsimit të mesëm. Në draftin ligjor që është dorëzuar në Kuvend deputetet shkruajnë se ata që do të ushtrojnë profesionin e mësuesit duhet të kalojnë me sukses një testim psiko-emocional.
Drafti synon identifikimin e mësuesve të dhunshëm, mësuesve me çrregullime mendore, me devijime të personalitetit, mësues pedofilë, maniakë etj., për t’u ndërprerë të drejtën e ushtrimit të profesionit.
Sipas propozimit të tyre, të gjithë mësuesit duhet të kalojnë në skanerin e psikiatrit, i cili do të bëjë një vlerësim e tyre.
Vlerësimi psiko-emocional për mësuesit që kanë fituar të drejtën e ushtrimit të profesionit zhvillohet çdo pesë vjet. Mësuesit, të cilët në çastin e hyrjes në fuqi të këtij ligji, ushtrojnë profesionin, kryejnë vlerësimin psiko-emocional, brenda një viti nga hyrja në fuqi e këtij ligji. Kriteret dhe mënyra e zhvillimit të vlerësimit përcaktohen me udhëzim të ministrit. Ky draft ende nuk ka hyrë për diskutim në komisionet parlamentare.
