Deputetja Mimoza Hafizi akuzoi sot në Kuvend kryeministrin Edi Rama dhe Ministren e Arsimit Lindita Nikolla se i kanë kthyer universitetet në situatë të jashtëligjshme. Hafizi ironizoi edhe Ramën, duke thënë se përsheshi i saj është dija, ndërsa përsheshi i Ramës është kanabisi.
“Unë jam njeri i librave shkruaj për atomet e elektronet dhe universet pa fund që i hapin mendjen studentëve dhe lexues. E ju këtë e përçmoni nuk e doni dijen jo më kot Shqipëria po rend në rrugën e kanabisit. Dija, përsheshi im, është një e ardhme e sigurtë. Kanabisi, përsheshi yt i trullos krijon iluzione kalimtare dhe të përplas mbrapsht në botën e errët të krimit”, tha Hafizi.
Deputetja Hafizi tha me ironi se djalli po shkëlqen hapur në dritën e diellit, duke lënë të nënkuptohet se gjithçka është bërë me qëllim për të favorizuar universitetet private.
“Thuhet që djalli qëndron në detaje po në këtë rast shkëlqen hapur në dritën e diellit. Në shkencat e natyrës ka vetëm 17 studentë nga 90 të kërkuar…S’ka ndodhur asnjëherë që të kemi kaq pak studentë në vitin e parë. Reformë është kjo? Për të dërrmuar Shkencat e Natyrës. Do mbushen thotë kryeministri me kë? Me studentët që i detyrojnë të vijnë aty?”, deklaroi Hafizi
