Partia Demokratike ka dalë kundër propozimit të kreut të LSI-së Ilir Meta për listat e hapura. Sekretari i Përgjithshëm i Partisë Demokratike, Arben Ristani tha se nuk është i rëndësishëm debati për lista të hapura apo të mbyllura deputetësh, duke shtuar se ky debat është tymnajë.
“E rëndësishme a do ketë Shqipëria zgjedhje të lira dhe të ndershme. Ne çdo rast, qytetarët votojnë për deputetët. Ne kemi pasur sisteme si mazhoritar dhe mazhoritar i përzier me proporcionalin. Për mua debate të tilla listë e mbyllur apo e hapur janë tymnajë. Lista e hapur ka problem me menaxhimin e sistemin zgjedhor. Ne na duhet sistem sa me i thjeshtë që qytetarët të votojnë sa më thjeshtë”, tha Ristani.
Ndërsa për uljen e numrit të deputetëve, një ide e hedhur më parë edhe nga kreu i Partisë Demokratike Lulzim Basha dhe i mbështetur së fundi edhe nga kreu i Kuvendit, Ilir Meta, Ristani tha se e mbështet këtë opsion.
