Qytetarë të shumtë vijojnë të dërgojnë në rrjetet sociale foto të avionëve të vegjël, që u kalojnë mbi shtëpitë apo pronat e tyre, pasi dyshojnë se mund të përdoren për trafik droge.
Pasditen e sotme, banorët e Kavajës kanë dërguar në portalin “Jeta osh qef” foto të një avioni të “çoroditur”, i cili duket sikur është në kërkim të një zone për të ndaluar.
Qytetarët shkruajnë: “Avioni mbi autostradën Kavajë-Rrogozhine, ne drejtim të Divjakës” “Nuk po gjen vend ku të ulet”.
Një ditë më parë, deputeti demokrat Asllan Dogjani dha alarmin në Kuvend se një avion me drogë është ulur në Gjirin e Lalëzit. Menjëherë reagoi Policia e Durrësit, e cila pohoi se avioni ka qenë me turistë, dhe ka fluturuar nga ora 16:00 deri në 17:00 mbi Gjirin e Lalzit, por nuk është ulur.
Edhe dy pilotët italianë, Giorgio Riformato dhe Guido Andrea Guidi, të cilët po përballen me drejtësinë shqiptare, pasi ulën avionët e tyre në territorin shqiptar me qëllimin për të trafikuar lëndë narkotike, deklaruan se ndodheshin në Shqipëri për qëllime turistike, por ishin detyruar të uleshin pasi kishin pësuar defekt në ajër.
