Martin Moli, 57 vjeç, i dënuar me 12 vite burg është arrestuar nga policia në Tiranë. Ai është shpallur fajtor për mashtrim me pasoja të rënda.
“Shtetasi i lartpërmendur ishte i shpallur në kërkim, pasi, Gjykata e Apelit Tiranë me vendimin e datës 06.06.2016, e ka dënuar me 12 vjet burg, për veprën penale “Mashtrim në bashkëpunim me shumë se një herë me pasojë të rëndë””, sqaron policia.
Materialet shtesë në ngarkim të tij do t’i kalojnë Prokurorisë për veprime të mëtejshme.
Sipas Prokurorisë, kallëzimi për këtë shtetas dhe dy shtetas të tjerë është bërë nga Bardhok Preçi, sipas të cilit, një person i dytë i kishte deklaruar se Martin Moli merrej me biznes dhe i ishte miratuar një kredi në një bankë gjermane prej 3 milionë eurosh.
Për këtë, Martinit i nevojiteshin një shumë parash në masën e 10% të shumës së kredisë, për ta depozituar si garanci në bankë.
Denoncuesi tha se Përparim Kovaçi, gjithashtu i dënuar nga gjykata, dinte se shtetasi Bardhok Preçi, kishte para në bankë pas shitjes së banesës së vajzës së tij.
Sipas kallëzuesit, Përparimi dhe Martini pretendonin se Martini kishte hapur një shoqëri tregtare me emrin “Drini” me te cilin kryente biznes dhe në emër të saj do të miratohej dhe kredia në bankën gjermane.
“Në lidhje me këtë fakt nga Q.K.R është kërkuar informacion nga i cili rezulton se i pandehuri Martin Moli ka patur të regjistruar si person juridik subjektin tregtar “Drini” sh.p.k i regjistruar si i tillë që në vitin 1998, por duke qenë se pas ndryshimit të sistemit të regjistrimit nuk është paraqitur për t’a riregjistruar në Q.K.R këtë subjekt, ai do të konsiderohet i çregjistruar. Përparimi i ka thënë kallëzuesit qe ta ndihmonte Martinin me shumën e parave. Për këtë kallëzuesi deklaron se i ka dhënë një shumë parash prej rreth 35.000 (tridhjetë e pesë mijë) euro”, sqaron Prokuroria në dosjen hetimore për rastin.
Këtë shumë parash-sipas hetuesve-kallëzuesi ja ka dhënë shtetasit Martin Moli me disa këste. Ai deklaron se për të siguruar këtë shumë, përveç shumës së parave që ai posedonte vetë, ai i ka marrë një shumë prej rreth 5.000 (pesë mijë) euro komshiut të tij shtetasit Qemal Troci, dhe këtë shumë parash ja ka dhënë Martinit.
Gjithashtu kallëzuesi i ka marrë edhe një të njohurit të tij shtetasit Frok Prenda një shumë prej 5.000 (pesë mijë) euro. Edhe këto ja ka dhënë shtetasit Martin Moli. Këto shuma parash, kallëzuesi është munduar disa herë t’ia marrë Martin Molit, por nuk ka arritur pasi ai e gënjente vazhdimisht.
Procedimi penal ndaj Molit dhe dy shokëve të tij ka nisur në vitin 2010.
