Debatet duket se janë ndezur ditën e sotme në parlament. Fjala e Blushit për largimin e tij nga Partia Socialiste dhe akuzat e tij ndaj “Rilindjes” kanë zemëruar deputetin e PS-së Taulant Balla, i cili ka replikuar me të. Balla i tha Blushit se postet që nuk ja dha Partia Socialiste e kanë bërë atë që të largohet nga kjo parti. “Ti ka zënë sytë urrejtja për PS dhe për Edi Ramën. Po të kishim bërë ty ministër Rilindja do ishte shumë e mirë, s’u bërë ti ministër, ne jemi të këqinj”, tha Balla.
Më tej ai në emër të grupit parlamentar socialist i ka kërkuar Blushit t’i kthejë mandatin socialistëve sepse tha se ia ka marrë padrejtësisht, ndërsa e akuzoi se ka kërkuar gjithmonë të marrë kryesimin e PS -së dhe të ketë një post ministror në qeveri.
Fjala e Ballës:
Doja të isha më i gjatë në këtë fjalë, por është për procedurë, dy deputetë të grupit parlamentar të PS me dëshirën e tyre vendosin të largohen dhe në emër të grupit parlamentar i uroj rrugë të mbarë. Madje po të doni hajdeni uluni dhe këtu meqë Saliu dhe Jozefina s’janë këtu mund të zini vendet e tyre. Një gjë po jua them në emër të grupit parlamentar socialist. Unë s’jam budist jam musliman por sot po ju kujtoj një shprehje “mos u shqetëso kurrë nga sulmet që të vijnë nga i ligu se janë si rëra e hedhur në erë, i shkojnë po të ligut. Keni vendosur të ikni rrugë të mbarë po ti që dole këtu s’je sjellë kurrë si socialist, atë karrige që je ulur atje e ke qyl.. Mandatin o kthejua socialistëve o mos e mbaj pandershmërisht. Ti ke braktisur socialistët në të gjitha betejat, kur luftonin në 2009 për të ruajtur mandatet e socialistëve se kishe mendjen, e kishe si të merrje PS, kur vriteshin në Bulevard ti flisje njëlloj si Saliu, mua më vjen shumë keq që një jetë fëmijësh është ndërprerë në mes, jeta e Arditit, por ti s’gjeje 1 minutë kohë të flisje për 4 socialistët e vrarë në Bulevard. Rilindja është PS, po e rilind Shqipërinë. Ti ka zënë sytë urrejtja për PS dhe për Edi Ramën. Po të kishim bërë ty ministër Rilindja do ishte shumë e mirë, s’u bërë ti ministër, ne jemi të këqinj. Ti kishe dy vjet që prisje të të hiqnim ne, ne nuk të heqim, sot ike vet, le të eci Beni vetë dhe ta provojë se sa të duan dhe të respektojnë shqiptarët. Edhe kur fole për kanabisin fole si Saliu, sa ia kemi arritur ky është vetëm fillimi i një procesi. Ti vetë ke pasur mundësinë të verifikosh sa punë të shkëlqyer ka bërë Policia e Shtetit. Udhë të mbarë pac, në emër të grupit tonë parlamentar kërkojmë që socialistëve ti kthesh mandatin që ia ke marrë padrejtësisht.
