Mbrojtësi i kombëtares shqiptare Arlind Ajeti është rikuperuar plotësisht nga dëmtimi në pjesën e pasme të kofshës së djathtë dhe pasi u rikthye në stërvitje me Torinon pas një muaji e gjysmë mungesë.
Por, ndërsa pret debutimin me “granatat” në Serinë A, emri i 23-vjeçarit vazhdon të lakohet në merkato.
Konkurrenca e madhe në mbrojtjen e Torinos dhe dy dëmtimet që e kanë penguar kuqeziun në këtë start të sezonit, e kanë bërë Peskaran të besojë se mund të sigurojë shërbimet e mbrojtësit të Kombëtares shqiptare.
“Delfinët” kanë nisur të mendojnë për përforcimet e merkatos së dimrit, ku synojnë afrimet e një sulmuesi dhe një mbrojtësi. Alternativa e preferuar në repartin mbrojtës mbetet pikërisht Ajeti, pavarësisht dy tentativave të dështuara të mëparshme.
Peskara kërkoi ta afronte mbrojtësin shqiptar kur ai luante ende te Frosinone dhe nuk e kishte ndërprerë kontratën me klubin e mëparshëm, ndërsa tentativa e dytë dështoi në ditën e fundit të merkatos së verës, me skuadrën e rikthyer në elitën e futbollit italian që humbi garën me Torinon.
Drejtuesit e Peskaras mbajnë kontakte të vazhdueshme me Torinon, për të vlerësuar në pas dy muajve e gjysmë mund ti dhurojnë trajnerit Masimo Odo një alternativë cilësore në qendër të mbrojtjes.
