Një 19-vjeçar është arrestuar nga Policia e Korçës, pasi është kapur në flagrancë, duke vjedhur automjete.
I riu 19 vjeç, Anxhelino Llapani, është denoncuar nga një qytetar, pasi është parë, duke bërë lëvizje të dyshimta pranë një automjeti.
Vjedhja ka ndodhur mbrëmjen e djeshme në një lagje në rrugën “Pano Xhamballa” në Korçë.
Pasi janë vënë në dijeni, forcat blu kanë shkuar në vendin ku pretendohej se 19-vjeçari po kryente lëvizje të dyshimta, shkruan GazetaExpress.
Llapani është konstatuar nga Policia se po vidhte vegla të ndryshme pune, në automjetin tip “Suzuki” pronë e M.I.
Po ashtu, ai kishte gjetur edhe metodën sesi do t’i transportonte sendet e vjedhura, duke vjedhur një mjet tjetër tip triçikël, në pronësi të F.G., të parkuar në rrugë.
Policia e ka arrestuar menjëherë atë, në kushtet e flagrancës, i cili do të gjykohet për veprën penale “Vjedhje”.
