Të rinjtë e Forumit Rinor të Partisë Demokratike kanë protestuar sot në vendgrumbullimin e mbetjeve në Porto Romano në Durrës.
Kreu i Departamentit te Mjedisit në PD Jamarbër Malltezi që mori pjesë në protestë, u shpjegoi të rinjve dëmet që i shkakton shëndetit te njeriut djegia e plehrave ne natyre sikurse ai që ndodh në Durrës.
Malltezi theksoi se vetëm dy km larg qytetit çlirohet dioksina, lënda kancerogjene, ndaj bëri thirrje që para importit të plehrave, të zgjidhet çështja e asgjësimit të mbetjeve të brendshme.
Sipas Malltezit, shteti nuk është në gjendje të kontrollojë avionët dhe skafet me drogë dhe jo më lëndët e rrezikshme.
“Duhet të kesh një guxim prej të marri që të thuash që në Shqipëri nuk do hyjë asnjë kg mbetje e rrezikshme ndërkohë që përditë dalin qindra kilogramë drogë dhe shteti nuk di gjë. U ndërtua një pistë avionësh droge 1800 metra dhe shteti sërish nuk dinte gjë. Avionët e drogës po bien nga pesha e madhe e drogës dhe shteti ne kërkon të na japë garanci që nuk do hyjë asnjë kilogram mbetje e rrezikshme që mund ti shkaktojë kancer qytetarëve”, tha Malltezi.
